راولپنڈی ، گردوں کے پیوندکارگروہ کا کارندہ گرفتار، اسٹریچرسے بندھا شہری بازیاب

جمعرات 7 اگست 2025 21:14

راولپنڈی (اُردو پوائنٹ اخبارتازہ ترین - این این آئی۔ 07 اگست2025ء)راولپنڈی پولیس نے گردوں کی غیرقانونی پیوندکاری کرنے والے گینگ کے خلاف دوسری بڑی کارروائی کرکیگینگ کے ایک کارندے کو گرفتار کرلیا۔میڈیا رپورٹ کے مطابق راولپنڈی میں پولیس نے اہم کارروائی کرتے ہوئے انسانی جسم کے اعضا کی خریدو فروخت میں ملوث گروہ کے کارندے کو گرفتار کیا ہے، چھاپے کے دوران اسٹریچر سے بندھے ہوئے نوجوان حنان زاہد کو بازیاب کروالیا گیا۔

پولیس حکام کی جانب سے بتایا گیا ہے کہ راولپنڈی میں گردوں کی غیر قانونی پیوندکاری کے خلاف آپریشن کا سلسلہ جاری ہے، اس دوران پولیس کو اہم کامیابی ملی ہے۔راولپنڈی پولیس نے چھاپہ مار کارروائی کی تو ایک شہری اسٹریچر سے بندھی ہوئی حالت میں ملا، جس کی شناخت حنان زاہد کے نام سے ہوئی، اس دوران ایک ملزم کو گرفتار بھی کیا گیا تاہم 6 ملزمان فرار ہونے میں کامیاب ہوگئے۔

(جاری ہے)

یاد رہے کہ 2 اگست کو راولپنڈی پولیس نے نوکری کا جھانسہ دے کر انسانی اعضا کی غیر قانونی پیوند کاری میں ملوث 4 رکنی گینگ کوگرفتار کرکے پیوند کاری میں استعمال ہونے والے آلات برآمد کیے تھے۔راولپنڈی کے تھانہ ایئرپورٹ پولیس نے بتایا تھا کہ ملزمان نے پاکستانی و غیر ملکی شہریوں کے لیے گردے فروخت کرنے کا انکشاف کیا تھا۔