روات پولیس کی بروقت کارروائی، انسانی اعضاء کی غیر قانونی پیوند کاری میں ملوث گینگ کا رکن گرفتار

جمعرات 7 اگست 2025 20:30

راولپنڈی (اُردو پوائنٹ اخبارتازہ ترین - اے پی پی۔ 07 اگست2025ء) روات پولیس کی بروقت کارروائی، انسانی اعضاء کی غیر قانونی پیوند کاری میں ملوث گینگ کا رکن گرفتار، آلات پیوند کاری، ادوایات اور دیگر سامان برآمد۔

(جاری ہے)

تفصیلات کے مطابق روات پولیس نے بروقت کارروائی کرتے ہوئے انسانی اعضاء کی غیر قانونی پیوند کاری میں ملوث گینگ کا رکن گرفتارکرلیا، آلات پیوند کاری، ادوایات اور دیگر سامان برآمد کرلیا،متن مقدمہ کے مطابق زیر حراست شخص نے گردے نکال کر ملکی و غیر ملکی شہریوں کے لئے گردے فروخت کرنے کا انکشاف کیا،پولیس کو دوران گشت اطلاع موصول ہوئی ٹھی،پولیس نے فوری رسپانڈ کیا تو ایک شخص کو سٹریچر سے بندھا پایا جسے آزاد کرایا گیا، متاثرہ شخص نے بتایا کہ اسے نوکری کے بہانے بلا کر نشہ آور شے پلائی اور مختلف میڈیکل ٹیسٹ کئے گئے، ٹیسٹ کروانے کا مقصد متاثرہ شخص کا گردہ نکال کر فروخت کرنا تھا، پولیس کے بروقت اور موثر رسپانس سے ایک شخص خطرناک غیر قانونی پیوندکاری سے بچ گیا، زیر حراست شخص سے تفتیش کی جا رہی ہے، فرار ملزمان کی گرفتاری کے لیے ریڈ کیے جا رہے ہیں،راولپنڈی پولیس شہریوں کے جان و مال کی حفاظت کے لیے تمام وسائل بروئے کار لا رہی ہے۔