خیبر پختونخوا میں دریائوں سے سونا نکالنے کے ٹھیکوں میں اربوں روپے کی کرپشن کا انکشاف

جمعرات 7 اگست 2025 20:40

پشاور (اُردو پوائنٹ اخبارتازہ ترین - این این آئی۔ 07 اگست2025ء)نیب خیبرپختونخوا نے صوبے میں دریائوں سے سونا نکالنے کے ٹھیکوں میں اربوں روپے کے مبینہ خوردبرد کے معاملے کی تحقیقات شروع کردیں۔نیب ذرائع کے مطابق دریائوں سے سونا نکالنے کیلئے ٹھیکوں میں اربوں روپے کی غبن ہوئی ہے، دریائے سندھ میں نظام پور، صوابی، کوہستان اور کوہاٹ سمیت دیگر علاقوں سے سونا نکالا جاتا ہے۔

(جاری ہے)

نیب ذرائع کے مطابق نظام پور میں سونا نکالنے کا ٹھیکہ 6ارب کی بجائے 4ارب پر دیا گیا ہے، من پسند افراد کو کم قیمت پر ٹھیکہ دیکر سرکاری خزانے کو اربوں کا نقصان پہنچایا گیا ہے، نیب نے متاثرہ ٹھیکہ دار کی شکایت پر تحقیقات کا آغاز کردیا ہے۔ذرائع کے مطابق محکمہ معدنیات سے قبضے میں لئے گئے ریکارڈ کی جانچ پڑتال شروع کردی گئی ہے، ریکارڈ کی جانچ پڑتال کے بعد ملوث افراد اور اہلکاروں کو شامل تفتیش کیا جائے گا۔