وقت آ گیا ہے حکومت مقامی سطح پر معاشی اصلاحات کا آغاز کرے : خادم حسین

جمعہ 8 اگست 2025 22:40

لاہور (اُردو پوائنٹ اخبارتازہ ترین - آن لائن۔ 08 اگست2025ء) فائونڈر ز گروپ کے سرگرم رکن ،پاکستان سٹون ڈویلپمنٹ کمپنی کے بورڈ آف ڈائریکٹر کے رکن ، سینئر نائب صدر فیروز پور روڈ بورڈاورسابق ممبر لاہور چیمبر آف کامرس خادم حسین نے کہا ہے کہ دعوئوں کے باوجود پاکستان کی معیشت آج بھی نازک صورتحال سے دوچار ہے، ہمارا موجودہ اخراجاتی حجم بے حد زیادہ ہے اور قرض پر مارک اپ موجودہ اخراجات کے کل حجم کا بڑا حصہ بن چکا ہے،ملک کا صنعتی ڈھانچہ جوں کا توں برقرار ہے جبکہ برآمدات کا حجم زیادہ ویلیو ایڈڈ پیداوار کے بجائے عالمی قیمتوں میں اتار چڑھا ئوپر منحصر ہے۔

اپنے بیان میں انہوں نے کہا کہ انہوںنے کہا کہ پاکستان کی مسلسل خراب معاشی کارکردگی کی اصل وجہ کو تلاش کرنا ہوگا ،ہر سال قومی بجٹ کا بڑا حصہ بے جا اخراجات میں چلا جاتا ہے ،آئی ایم ایف نے اپنی دستاویزات میں خبردار کیا ہے کہ ایسے اقدامات ملک میں سماجی بے چینی کی بنیاد رکھ سکتے ہیں۔

(جاری ہے)

انہوں نے کہا کہ پاکستان اب بھی بار بار آئی ایم ایف پر انحصار کر رہا ہے ،پاکستان اس وقت آئی ایم ایف کے چوبیسویں پروگرام میں ہے اور وقت گزرنے کے ساتھ ساتھ بجائے اس کے کہ آئی ایم ایف معیشت پر اپنی گرفت نرم کرے اس نے اسے اس حد تک سخت کر دیا ہے کہ میڈیا رپورٹس کے مطابق اب دوست ممالک بھی پاکستان کو قرض فراہم کرنے میں ہچکچاہٹ کا شکار ہوتے ہیں۔

انہوںنے کہا کہ اب وقت آ گیا ہے کہ حکومت مقامی سطح پر معاشی اصلاحات کا آغاز کرے جن کی بنیاد ان بااثر طبقوں کی رضاکارانہ قربانی پر ہو جو ہر سال اخراجات اور آمدنی کے لحاظ سے بجٹ کے بڑے حصے کے مستحق قرار پاتے ہیں۔ اس کے ساتھ ساتھ، سیاسی استحکام اور داخلی سلامتی کو بھی یقینی بنانا ہوگا کیونکہ یہی عوامل ملک کی معیشت کو موثر اور بامعنی انداز میں ترقی دینے میں مددگار ثابت ہوں گے۔