جاگراں ہائیڈل پاور پراجیکٹ عوام کی توانائی کی ضروریات پورا کرنے کے لئے سنگ میل کی حیثیت رکھتا ہے،وزیراعظم آزاد جموں و کشمیر

جمعہ 8 اگست 2025 20:10

مظفر آباد (اُردو پوائنٹ اخبارتازہ ترین - اے پی پی۔ 08 اگست2025ء) وزیراعظم آزاد حکومت ریاست جموں و کشمیر چوہدری انوارالحق کو جاگراں ہائیڈل پاور پراجیکٹ فیز 2 کے حوالہ سے بریفنگ دی گئی ، سیکرٹری پاور ڈویلپمنٹ و برقیات ارشاد احمد قریشی نے وزیراعظم آزادکشمیر کو تعمیراتی کام میں تاخیر کی وجوہات اور معاملہ پر ہونے والی پیش رفت کے حوالے سے تفصیلی بریفنگ دی ، اس موقع پر وزیر حکومت چوہدری اظہر صادق ، چیف سیکرٹری خوشحال خان ، پرنسپل سیکرٹری ظفر محمود خان، سیکرٹری برقیات ارشاد احمد قریشی سمیت دیگر بھی موجود تھے ، وزیراعظم آزادکشمیر چوہدری انوار الحق کو سیکرٹری پاور ڈویلپمنٹ و برقیات ارشاد احمد قریشی نے منصو بہ کے لیے ڈیزائن پینلز کی انسٹالیشن میں حائل رکاوٹوں کے خاتمہ پر ہونے والی پیش رفت اور مستقبل کے لیے ترجیحات پر تفصیلی بریفنگ دی ۔

(جاری ہے)

اس موقع پر بات کرتے ہوئے وزیراعظم آزادکشمیر چوہدری انوار الحق نے کہا کہ یہ منصوبہ عوام کی توانائی کی ضروریات کو پورا کرنے میں سنگ میل کی حیثیت رکھتا ہے ، منصوبے پر مؤثر حکمت عملی کے ساتھ اقدامات اٹھائے جائیں، منصو بہ پر کام کرنے والے غیر ملکی انجینئرز کے ساتھ مل کر رکاوٹوں اور تعطل کا خاتمہ کیا جائے ، حکومت منصوبے کی جلد تکمیل کی خواہاں ہے ، وزیراعظم آزادکشمیر نے اس ضمن میں تمام دستیاب وسائل کو بروئے کار لانے کی ہدایت بھی کی ۔