نارویجن پولیس کے اعلیٰ سطحی وفد کی سنٹرل پولیس آفس آمد، آئی جی پنجاب ڈاکٹر عثمان انور سے ملاقات

جمعہ 8 اگست 2025 20:10

لاہور (اُردو پوائنٹ اخبارتازہ ترین - این این آئی۔ 08 اگست2025ء)انسپکٹر جنرل پولیس پنجاب ڈاکٹر عثمان انور سے نارویجن پولیس کے اعلیٰ سطحی وفد نے سنٹرل پولیس آفس میں ملاقات کی۔ ایڈیشنل آئی جی پنجاب سلطان احمد چوہدری، اے آئی جی ایڈمن ڈاکٹر اسد اعجاز ملہی، اے آئی جی انسپکشن شائستہ ندیم اور ایس ایس پی انوسٹی گیشن راولپنڈی صبا ستار سمیت سینئر افسران موقع پر موجود تھے۔

ڈپٹی چیف آف نارویجن پولیس کیٹل ہاکاس ، نارویجن پولیس چیف سپرنٹنڈنٹ ٹارکجیلڈ جیونی ،عہدہ سنبھالنے والے نئے نارڈک رابطہ افسر بورج اینوکسن ، سبکدوش ہونے والے نارڈک رابطہ افسر پرمارٹن بجارٹن اور ایڈوائزر نارڈک رابطہ افسر نارویجن ایمبیسی صغیر افضل وفد میں شامل تھے۔ ترجمان پنجاب پولیس نے بتایا کہ آئی جی پنجاب نے نارویجن پولیس آفیسرز کو غیر ملکی شہریوں کی سکیورٹی کیلئے پنجاب پولیس کے اقدامات بارے آگاہ کیا۔

(جاری ہے)

یاد رہے پنجاب پولیس اور نارویجن پولیس کے درمیان بین الاقوامی آرگنائزڈ کرائم کے خاتمے کے لیے انتہائی قریبی روابط اور تعاون موجود ہے۔پنجاب اور نارویجن پولیس دہشت گردی، شدت پسندی، منشیات، آرگنائزڈ کرائم، ہیومن ٹریفیکنگ اور منی لانڈرنگ کے خاتمے کے لئے ایک پیج پر ہیں۔سائبر کرائم اور ڈیجیٹل فراڈ کے بڑھتے چیلنجز سے نبردآزما ہونے کے لئے نارویجن پولیس سے ٹریننگ پر تبادلہ خیال کیا گیا۔

آئی جی پنجاب نے کہا کہ ناروے سمیت غیر ملکی شہریوں کی سکیورٹی پنجاب پولیس کی اولین ترجیحات میں شامل ہے۔سپیشل پروٹیکشن یونٹ صوبہ بھر میں غیر ملکی شہریوں کی سکیورٹی کے فرائض جانفشانی سے سر انجام دے رہا ہے۔انسداد جرائم اور پبلک سروس ڈلیوری میں آئی ٹی بیسڈ پولیسنگ کو فروغ دے رہے ہیں۔پنجاب پولیس کی استعداد کار میں اضافہ کیلئے باہمی تعاون بڑھانے پر اتفاق رائے ہوا۔آئی جی پنجاب نے وفد کے سربراہ کو پنجاب پولیس کے تھانوں کی اپ گریڈیشن پر مبنی خصوصی کتاب ’’تھانے پنجاب دے‘‘پیش کی جبکہ وفد نے اے آئی جی انسپکشن شائستہ ندیم کو سووینئر پیش کیا۔