پیرامیڈیکل و الائیڈ ہیلتھ سائنسز کے زیر انتظام امتحانات کی تیاریاں مکمل

جمعہ 8 اگست 2025 20:20

پشاور (اُردو پوائنٹ اخبارتازہ ترین - اے پی پی۔ 08 اگست2025ء) چیف ایگزیکٹیو آفیسر خیبرپختونخوا پیرامیڈیکل فیکلٹی ڈاکٹر رحمان آفریدی نے کہا ہے کہ صوبے بھر کے پیرامیڈیکل و الائیڈ ہیلتھ سائنسز انسٹی ٹیوٹس کے ڈپلومہ کورس امتحانات اگست 2025 کے لیے بھرپور تیاری مکمل کر لی گئی ہے۔ اس سلسلے میں 37 ہزار سے زائد طلبا و طالبات کو رول نمبر سلپس جاری کر دی گئی ہیں جو متعلقہ اداروں سے حاصل کی جا سکتی ہیں۔

(جاری ہے)

انہوں نے بتایا کہ رول نمبر سلپس ایف پی اے ایچ ایس کے ویب پورٹل پر بھی اپ لوڈ کر دی گئی ہیں اور تمام انسٹی ٹیوٹس کو ہدایت کی گئی ہے کہ طلبا کو ان کی بروقت فراہمی یقینی بنائی جائے۔ڈاکٹر رحمان آفریدی کے مطابق امتحانی پیپرز کی پرنٹنگ کا عمل جلد مکمل ہوجائے گا اور انہیں سکیورٹی پروٹوکول کے تحت متعلقہ مراکز تک پہنچایا جائے گا۔ انہوں نے تمام انسٹیٹیوٹس کو ہدایت کی کہ امتحانی ضوابط کی مکمل پاسداری کو یقینی بنایا جائے تاکہ امتحانات شفاف اور منظم طریقے سے منعقد ہوں۔