فیصل کریم کنڈی کی حضرت شاہ عبداللطیف بھٹائی کی مزار پر فاتحہ خوانی ، چادر چڑھا کر 282ویں عرس مبارک کا افتتاح کیا

ہفتہ 9 اگست 2025 22:01

پشاور(اُردو پوائنٹ اخبارتازہ ترین - این این آئی۔ 09 اگست2025ء) گورنر خیبر پختونخوا فیصل کریم کنڈی نے سندھ کے صوبائی وزیر ثقافت ذوالفقار علی شاھ کے ہمراہ صوفی بزرگ اور شاعر حضرت شاھ عبداللطیف بھٹائی کی مزار پر فاتحہ خوانی کر کے اور چادر چڑھا کر 282ویں عرس مبارک کا افتتاح کیا۔گورنر نے اس موقع پر غریب خواتین میں کپڑے اور تحائف بھی تقسیم کیی. اس موقع پر میڈیا سے گفتگو کرتے ہوئے گورنر خیبرپختونخوا فیصل کریم کنڈی نے کہا کہ پاکستان نے ماضی میں بھارت کی جانب سے مسلط کی گئی جنگ کے باوجود ہمیشہ امن کا پیغام دیا اور کشمیری عوام کے حق میں سفارتی محاذ پر بھرپور جدوجہد کی۔

گورنر نے کہا کہ بھارت نے پاکستان کی فوجی اور معاشی صلاحیتوں کو کمزور سمجھ کر جارحیت کی کوشش کی، لیکن پاک فضائیہ نے منٹوں میں بھرپور جواب دے کر دشمن کو خاموش کر دیا۔

(جاری ہے)

جنگ کے دوران سندھ سے چترال تک پوری قوم افواجِ پاکستان کے شانہ بشانہ کھڑی رہی، شہداء نے جانوں کے نذرانے پیش کیے اور مسلح افواج نے ہر محاذ پر شجاعت کا مظاہرہ کیا۔انہوں نے کہا کہ پارٹی چیئرمین بلاول بھٹو زرداری اور وزیراعظم نے مختلف ممالک کا دورہ کر کے عالمی سطح پر کشمیر کا مقدمہ پیش کیا اور بھارت کو سفارتی طور پر تنہا کرنے میں کامیاب رہے۔

پاکستانی میڈیا نے اس موقع پر ذمہ دارانہ کردار ادا کیا جبکہ بھارتی میڈیا تضاد بیانی کا شکار رہا۔ گورنر نے کہا کہ دہشت گردی کے خاتمے کے لیے سیکیورٹی فورسز، پولیس اور عوام کو مل کر کردار ادا کرنا ہوگا۔ ریاستی تنصیبات پر حملہ کرنے والوں کو سخت ترین سزائیں دی جائیں تاکہ ملک میں موثر نظامِ سزا و جزا قائم ہو سکے۔صوبائی وزیر ثقافت سید ذوالفقار علی شاہ نے فیصل کریم کنڈی کا عرس مبارک کی افتتاحی تقریب میں شرکت پر شکریہ ادا کیا. بعدازاں گورنر نے شاھ جو باغ میں کلچرل ویلج کا افتتاح بھی کیا اور دستکاری کے مختلف اسٹالز کا معائنہ کیا بعدازاں ثقافتی گوٹھ میں بیٹھ کر کچھری کی اور لوک موسیقی سنی، علاوہ ازیں انہوں نے ایچ ٹی سورلی ھال بھٹ شاھ کا بھی دورہ کیا، اس موقع پر ڈپٹی کمشنر مٹیاری محمد یوسف شیخ، ایس ایس پی اعجاز میمن و دیگر بھی ان کے ہمراہ تھے۔