پہلے ون ڈے میچ جیت کا کریڈٹ حسن نواز اور حسین طلعت کو جاتا ہے‘محمد رضوان

بولنگ میں بہتری کی ضرورت ہے۔ شاہین اور نسیم نے آخری اوورز میں اچھی بولنگ کی،گفتگو

اتوار 10 اگست 2025 11:30

ٹرانینڈو(اُردو پوائنٹ اخبارتازہ ترین - این این آئی۔ 10 اگست2025ء)پاکستان ون ڈے ٹیم کے کپتان محمد رضوان کا کہنا ہے کہ پہلے ون ڈے میچ جیت کا کریڈٹ حسن نواز اور حسین طلعت کو جاتا ہے۔ویسٹ انڈیز کے برائن لارا اسٹیڈیم میں کھیلے گئے پہلے ون ڈے میچ میں پاکستان نے ویسٹ انڈیز کو پانچ وکٹوں سے شکت دی، ویسٹ انڈیز کی جانب سے دیا جانے والا 281 رنز کا ہدف گرین شرٹس نے 5 وکٹوں کے نقصان پر حاصل کرلیا۔

(جاری ہے)

حسن نواز کو ڈیبیو پر شاندار 63 رنز کی ناقابل شکست اننگز کھیلنے پر میچ کا بہترین کھلاڑی قرار دیا گیا۔کپتان محمد رضوان نے 53، بابر اعظم نے 47 رنز بناکر آؤٹ ہوئے، حسین طلعت نے 41 اور سلمان آغا نے 23 رنز بنائے۔پہلا ون ڈے جیتنے کے ساتھ ہی پاکستان کو تین میچز کی سیریز میں 0-1 کی برتری حاصل ہوگئی۔ تاہم میچ کے بعد میڈیا سے گفتگو کرتے ہوئے کپتان محمد رضوان نے کہا کہ حسن نواز اور حسین طلعت نے جس طرح پارٹنر شپ قائم کی اور میچ جتوایا وہ خوش آئند ہے۔انہوں نے کہا کہ بولنگ میں بہتری کی ضرورت ہے۔ شاہین اور نسیم نے آخری اوورز میں اچھی بولنگ کی، کنڈیشنز کا فائدہ اٹھاتے تو ویسٹ انڈیز کو 230 رنز تک روک سکتے تھے۔