بحریہ یونیورسٹی کراچی کیمپس کے 21ویں کانووکیشن کا انعقاد

زندگی میں سیکھنے کاسفر مسلسل جاری رکھیں، اپنے مقاصد میں ثابت قدم رہیں اور چیلنجز کا سامنا حوصلے اور عزم سے کریں،ایڈمرل نوید اشرف

اتوار 10 اگست 2025 22:15

کراچی(اُردو پوائنٹ اخبارتازہ ترین - این این آئی۔ 10 اگست2025ء)بحریہ یونیورسٹی کراچی کیمپس، انسٹیٹیوٹ آف پروفیشنل سائیکالوجی اور پاکستان نیوی اسکول آف لاجسٹکس کا 21واں کانووکیشن منعقد ہوا۔ پاک بحریہ کے سربراہ اور بحریہ یونیورسٹی کے پرو چانسلر ایڈمرل نوید اشرف نے بطور مہمانِ خصوصی شرکت کی اور فارغ التحصیل طلبا و طالبات میں ڈگریاں تقسیم کیں۔

تقریب سے خطاب کرتے ہوئے ایڈمرل نوید اشرف نے فارغ التحصیل طلبا کو تاکید کی کہ زندگی میں سیکھنے کاسفر مسلسل جاری رکھیں، اپنے مقاصد میں ثابت قدم رہیں اور چیلنجز کا سامنا حوصلے اور عزم سے کریں۔ انہوں نے اس بات پر زور دیا کہ دیانت داری، لگن اور محنت کی مضبوط بنیاد ہی آپ کی شناخت کو دوام بخشے گی اور آپ کے خاندان، پیشے اور مادرِ علمی کے لیے باعثِ فخر بنے گی۔

(جاری ہے)

اس سے قبل، استقبالیہ کلمات میں ریکٹر بحریہ یونیورسٹی وائس ایڈمرل آصف خالق (ریٹائرڈ) نے بحریہ یونیورسٹی کے عزم کو ایک بار پھر دہرایا کہ وہ تعلیم کے اعلی معیار اور ہمہ جہتی ترقی کے لیے کوشاں ہے۔ انہوں نے اس اعتماد کا اظہار کیا کہ بحریہ یونیورسٹی کے فارغ التحصیل طلبا نہ صرف اپنے پیشہ ورانہ شعبوں میں نمایاں کارکردگی دکھانے کے لیے مکمل تیار ہیں بلکہ دیانت داری کے ساتھ قیادت کرتے ہوئے معاشرے میں مثبت کردار ادا کریں گے۔

تقریب میں مختلف شعبہ جات میں 3,276 ڈگریاں، بشمول تین پی ایچ ڈی ڈگریاں، تقسیم کی گئیں۔ غیر معمولی تعلیمی کارکردگی کے اعتراف میں 95 گولڈ میڈل اور 90 سلور میڈل بھی نمایاں طلبا کو دیے گئے۔تقریب میں فارغ التحصیل طلبا، ان کے اہلِ خانہ، سینئر افسران، اساتذہ کرام اور تدریسی حلقوں کی معزز شخصیات نے شرکت کی۔