کراچی، منگھوپیر میں انٹیلی جنس بیسڈ آپریشن، کالعدم تنظیم کے دو تربیت یافتہ دہشت گرد گرفتار

دونوں ملزمان افغانستان کے معروف عسکری کیمپ سے تربیت یافتہ ہیں‘ترجمان سی ٹی ڈی سندھ

پیر 11 اگست 2025 12:42

کراچی(اُردو پوائنٹ اخبارتازہ ترین - این این آئی۔ 11 اگست2025ء)کراچی میں محکمہ انسداد دہشت گردی (سی ٹی ڈی)، وفاقی حساس ادارے اور پولیس کی مشترکہ کارروائی کے دوران منگھوپیر سے کالعدم تنظیم فتنة الخوارج سے تعلق رکھنے والے دو خطرناک دہشت گردوں کو گرفتار کر لیا گیا۔ترجمان سی ٹی ڈی سندھ کے مطابق انٹیلیجنس بیسڈ آپریشن کے دوران گرفتار کیے گئے دہشت گردوں کی شناخت عبدالوکیل اور اجمل کے نام سے ہوئی ہے، جن کا تعلق کالعدم تنظیم ''فتنہ تل خوارج'' (ٹی ٹی پی) سے ہے۔

(جاری ہے)

ترجمان کے مطابق دونوں ملزمان افغانستان کے معروف عسکری کیمپ سے تربیت یافتہ ہیں اور انتہائی مطلوب شدت پسند شریف اللہ کے قریبی ساتھی ہیں۔ترجمان محکمہ انسداد دہشت گردی سندھ کے مطابق گرفتار ملزمان کا تعلق قلعہ عبداللہ بلوچستان سے ہیں اور ملزمان کو شہر کراچی میں کسی کارروائی کے غرض سے بھیجا گیا تھا اور انہیں ٹارگٹ دینا تھا۔ترجمان کا مزید کہنا تھا کہ گرفتار ملزمان کو مزید انٹیروگیٹ کیا جا رہا ہے اور تھانہ سی ٹی ڈی کراچی میں کراچی میں مقدمات قائم کیے جائیں گے۔