Live Updates

بابر اعظم نے نمبر 3 پر زیادہ بار صفر کی خفت سے دوچار ہونے کا انضمام الحق کا شرمناک ریکارڈ توڑ دیا

30 سالہ بیٹر ویسٹ انڈیز کیخلاف دوسرے ون ڈے میں بغیر کوئی رن سکور کیے جیڈن سیلز کی گیند پر بولڈ ہوئے

ذیشان مہتاب پیر 11 اگست 2025 11:41

ٹرینیڈاڈ (اردو پوائنٹ تازہ ترین اخبار ۔ 11 اگست 2025ء ) قومی ٹیم کے سابق کپتان بابر اعظم نے نمبر 3 پر زیادہ بار صفر کی خفت سے دوچار ہونے کا انضمام الحق کا ریکارڈ توڑ دیا۔

30 سالہ بابر اعظم ویسٹ انڈیز کیخلاف دوسرے ون ڈے میں بغیر کوئی رن سکور کیے جیڈن سیلز کی گیند پر بولڈ ہوئے، یہ ان کے کیریئر میں 5واں موقع تھا جب وہ صفر کی خفت سے دوچار ہوئے۔

نمبر 3 پر بیٹنگ کرتے ہوئے ون ڈے میں پاکستان کے لیے سب سے زیادہ مرتبہ صفر پر آئوٹ ہونے والے بیٹرز کی فہرست میں بابر اعظم نے اب انضمام الحق کو پیچھے چھوڑ دیا ہے۔

اس فہرست میں یونس خان 12 مرتبہ بغیر کوئی رن بنائے پوویلین لوٹ کر پہلے، اعجاز احمد 9 مرتبہ صفر پر آئوٹ ہوکر دوسرے، بابر اعظم اور سلیم ملک 5،5 مرتبہ سکور بورڈ کو حرکت دیئے بنا پوویلین لوٹ کر تیسرے جب کہ انضمام الحق 4 مرتبہ صفر پر آئوٹ ہوکر چوتھے نمبر پر ہیں ۔

(جاری ہے)

واضح رہے کہ ویسٹ انڈیز نے بارش سے متاثرہ سیریز کے دوسرے ون ڈے میچ میں پاکستان کو 5 وکٹوں سے شکست دے کر سیریز 1-1 سے برابر کر دی۔

3 ون ڈے میچز کی سیریز کا دوسرا میچ ٹرینیڈاڈ میں کھیلا گیا جس میں میزبان ویسٹ انڈیز نے پاکستان کے خلاف ٹاس جیت کر فیلڈنگ کا فیصلہ کیا۔

پاکستان ٹیم میں آج تین تبدیلیاں کی گئیں۔ حسن علی، محمد نواز اور محمد ابرار کو شامل کیا گیا جبکہ فہیم اشرف، سفیان مقیم اور نسیم شاہ آج کی پلیئنگ الیون میں شامل نہیں تھے۔

پاکستان کی اننگز کے دوران میچ بارش کی وجہ سے 3 مرتبہ روکا گیا اور اننگز کو 37 اوورز تک محدود کیا گیا۔

بارش سے متاثرہ میچ میں گرین شرٹس نے مقررہ 37 اوورز میں 7 وکٹ پر 171 رنز بنائے۔ تاہم ڈرک ورتھ لوئس میتھڈ کے تحت ویسٹ انڈیز کو 35 اوورز میں 181 رنز کا ہدف ملا۔

پاکستان کی جانب سے بابر اعظم صفر، محمدرضوان 16، سلمان آغا 9 رن بنا کر آؤٹ، صائم ایوب نے 23، عبداللہ شفیق نے 26 اور حسین طلعت نے 31 رنز بنائے جب کہ حسن نواز 36 رنز اور شاہین آفریدی 11 رنز بنا کر ناٹ آؤٹ رہے۔

ویسٹ انڈیز کی جانب سے جیڈن سیلز نے 3 ، روسٹن چیز، ،موتی، شمار جوزف اور بلیڈز نے ایک ایک وکٹ حاصل کی۔

ویسٹ انڈیز نے پاکستان کا 181 رنز کا ہدف با آسانی 34 ویں اوور میں 5 وکٹوں کے نقصان پر حاصل کرلیا۔

ویسٹ انڈیز کی جانب سے روسٹن چیز 49 رنز اور جسٹن گریوز 26 بناکر ناقابل شکست رہے۔

رتھرفورڈ 45، شائے ہوپ 32 اور کارٹے 16 رنز بناسکے۔ پاکستان کی جانب سے حسن علی اور محمد نواز نے 2،2 وکٹیں لیں جبکہ ابرار احمد نے ایک کھلاڑی کو آؤٹ کیا۔

واضح رہے کہ سیریز کے پہلے میچ میں پاکستان نے ویسٹ انڈیز کو 5 وکٹوں سے شکست دی تھی تاہم دوسرے میچ میں ویسٹ انڈیز کی کامیابی کے بعد 3 میچز پر مشتمل سیریز1-1 سے برابر ہوگئی ہے۔ آخری میچ منگل کو کھیلا جائے گا۔