نئی نسل کو آزادی کی قدر و قیمت سے آشنا رکھنے کیلئے جشن آزادی کو ملی جوش و جذبے سے منانا ناگزیر ہے،ترجمان ڈویژنل انتظامیہ

پیر 11 اگست 2025 14:37

فیصل آباد (اُردو پوائنٹ اخبارتازہ ترین - اے پی پی۔ 11 اگست2025ء) جشن آزادی کے حوالے سے فیصل آباد کے بازاروں، مارکیٹوں، شاہراہوں، تجارتی عمارات، گلی محلوں، سرکاری و نیم سرکاری عمارات کو خوبصورتی سے سجانے کا عمل جاری ہے جس میں فیصل آباد کی تاجر برادری اور نوجوان بڑھ چڑھ کر حصہ لے رہے ہیں جبکہ ڈویژنل انتظامیہ کی جانب سے کہا گیا ہے کہ اس عظیم الشان جشن آزادی کے موقع پر تاجر برادری کی شاندار روایات کو کسی صورت نظر انداز نہیں کیا جا سکتا۔

ڈویژنل انتظامیہ کے ترجمان نے اے پی پی سے بات چیت کے دوران تعمیرپاکستان میں تاجر برادری کے شاندار کردار کو خراج تحسین پیش کرتے ہوئے کہا کہ نئی نسل کو آزادی کی قدر و قیمت سے آشنا رکھنے کیلئے ملی جوش و جذبے سے یوم آزادی کومنانا ناگزیر ہے۔

(جاری ہے)

انہوں نے کہا کہ تاجر کاروباری سرگرمیوں کے ذریعے وطن کی خدمت کے ساتھ ساتھ دکھی انسانیت کی بھلائی کیلئے بھی فلاحی منصوبوں پر عمل پیرا ہیں اور وہ کسی بھی مشکل وقت میں امدادی سرگرمیوں میں ہمیشہ پیش پیش رہے ہیں جو کہ وطن اور ہم وطنوں سے ان کی گہری محبت کا واضح ثبوت ہے۔

انہوں نے کہا کہ جشن آزادی کے پروگرامز میں شاندار روایات کو برقرار رکھتے ہوئے شہر میں آزادی کا دن منانے کا پر جوش ماحول بلندی پر نظر آنا چاہئے۔ دریں اثنا تاجر نمائندوں نے اے پی پی کو جشن آزادی کے پروگرامز سے آگاہ کرتے ہوئے بتایا کہ چوک گھنٹہ گھرکے ۱ٓ ٹھوں بازاروں سمیت دیگر بازاروں اور مارکیٹوں، غلہ و سبزی منڈیوں اور دیگر کاروباری مراکز کو قومی پرچموں اور دیگر آرائشی اشیاسے سجایا جارہا ہے۔انہوں نے بتایا کہ آئندہ تینوں روز کے دوران مختلف اوقات میں آزادی کے کیکس کاٹنے کی تقاریب بھی منعقد کی جائیں گی جبکہ سرکاری سطح پر ہونے والی تقریبات میں بھر پور شرکت کی جائے گی۔