اسلام آباد میں سی ڈی اے نے گرین بیلٹ پر قائم مسجد شہید کر دی، علما کا پھر تعمیر کا اعلان

علما نے اسی مقام پر نماز ادا کی، لوگوں نے انتظامیہ کے لگائے گئے پودے اکھاڑ دئیے

پیر 11 اگست 2025 17:49

اسلام آباد میں سی ڈی اے نے گرین بیلٹ پر قائم مسجد شہید کر دی، علما کا ..

اسلام آباد (اُردو پوائنٹ اخبارتازہ ترین - این این آئی۔ 11 اگست2025ء)کیپیٹل ڈیویلپمنٹ اتھارٹی (سی ڈی ای) نے راول ڈیم چوک کے قریب گرین بیلٹ پر تعمیر کی گئی پرانی مسجد کو شہید کرے پودے اور درخت لگا دئیے۔میڈیا رپورٹ کے مطابق سی ڈی اے حکام نے دعویٰ کیا ہے کہ مسجد کو شہید (مسمار) کرنے کی کارروائی مسجد اور مدرسے کی انتظامیہ کی رضا مندی سے کی گئی، مدرسے کو باہمی اتفاق رائے سے مارگلہ ٹاؤن منتقل کیا گیا ہے۔

مسجد کو شہید (مسمار) کرنے کا آپریشن ہفتے کی شب کیا گیا، تاہم علمائے کرام نے کہا کہ معاہدے کے مطابق صرف مدرسے کو مارگلہ ٹاؤن منتقل کیا جانا تھا۔گزشتہ روز مقامی علما نے اسی مقام پر نماز ادا کی، جہاں پہلے مسجد واقع تھی، انہوں نے سی ڈی اے سے مطالبہ کیا کہ مسجد کو از سر نو تعمیر کرکے دیا جائے۔

(جاری ہے)

وفاق المدارس العربیہ کے اسلام آباد چیپٹر کے صدر مفتی عبدالسلام نے کہا کہ ہم سی ڈی اے اور انتظامیہ کے اقدام کی مذمت کرتے ہیں، ہم اسی مقام پر دوبارہ سے مسجد تعمیر کریں گے۔

انہوں نے کہا کہ سی ڈی اے یا انتظامیہ سے مسجد کو شہید (مسمار) کرنے کا کوئی معاہدہ نہیں ہوا تھا، صرف مدرسہ مارگلہ ٹاؤن منتقل کرنے پر اتفاق رائے کیا گیا تھا، ہم اس وقت مدرسے کی بات نہیں کر رہے، بلکہ قدیمی مدنی مسجد کی بات کر رہے ہیں، جسے سی ڈی اے نے شہید کر دیا۔انہوں نے بتایا کہ شہید کی گئی مسجد کو محکمہ اوقاف اسلام آباد کی جانب سے چلایا جارہا تھا، ہم پیر سے مسجد کی دوبارہ تعمیر کا آغاز کریں گے، لوگوں نے یہاں لگائے گئے درخت اکھاڑ دیے ہیں۔