امارات کا سفر؛ دبئی اور شارجہ ایئرپورٹس پر ممنوعہ اشیاء کی فہرست جاری

دبئی ( اُردو پوائنٹ اخبارتازہ ترین۔ 11 اگست 2025ء ) متحدہ عرب امارات کے سفر کے دوران دبئی اور شارجہ ایئرپورٹس پر پسافروں کے سامان میں ممنوعہ قرار دی جانے والی اشیاء کی فہرست جاری کردی گئی۔ خلیج ٹائمز کے مطابق متحدہ عرب امارات کی ایئرپورٹ اتھارٹیز بشمول دبئی اور شارجہ ایئرپورٹس نے حال ہی میں ہینڈ بیگ اور چیک ان بیگ میں ممنوعہ اور محدود اشیاء کی مکمل فہرست جاری کی ہے، ان تمام اشیاء کی تفصیل سامنے آ چکی ہے تاکہ مسافروں کا سفر نا صرف محفوظ ہو بلکہ بغیر کسی پریشانی کے مکمل ہوسکے، اکتوبر سے ایمریٹس کی پرواز کے دوران پاور بینک کے استعمال پر مکمل پابندی عائد کی گئی ہے، مسافر صرف مخصوص حد کے اندر پاور بینک ساتھ رکھ سکتے ہیں لیکن اس کا استعمال دورانِ پرواز ممنوع ہوگا۔

بتایا گیا ہے کہ دبئی ایئرپورٹ پر ہینڈ بیگیج میں ممنوعہ قرار دی جانے والی اشیاء میں ہتھوڑی (ہیمر) ، کیل، سکریو ڈرائیور اور تیز دھار کام کے اوزار، قینچیاں جن کے بلیڈ 6 سینٹی میٹر سے لمبے ہوں، ذاتی صفائی کے آلات جن کے حصے 6 سینٹی میٹر سے بڑے ہوں ضبط کر لیے جائیں گے، تلواریں اور دیگر نوکیلی اشیاء، ہتھکڑیاں، آتشیں اسلحہ، فلیئر گن کے کارتوس، لیزر گن، واکی ٹاکی، لائٹر، بیٹ، مارشل آرٹس کے ہتھیار، ڈرل مشین، رسیاں، ماپنے کی ٹیپ، پیکنگ ٹیپ، برقی تاریں صرف ذاتی استعمال کی حد تک اجازت ہے شامل ہیں۔

(جاری ہے)

اسی طرح دبئی میں ہینڈ بیگیج کے لیے محدود اشیاء میں مائع اشیاء میں ہر بوتل 100ml سے زیادہ نہ ہو، زیادہ سے زیادہ 10 بوتلیں یعنی ایک لیٹر کی اجازت ہے، ڈاکٹر کے نسخے کے بغیر ادویات لے جانا منع ہے، اگر کسی کے جسم میں میٹل امپلانٹ ہو تو ڈاکٹر کا سرٹیفکیٹ لازمی ہوگا، پاور بینک 100Wh سے کم کی طاقت کے پاور بینک کی اجازت ہے، 100Wh سے 160Wh تک کی صورت میں ایئرلائن کی منظوری درکار ہے، 160Wh سے زیادہ پاور بینک لے جانا بالکل منع ہے، دورانِ پرواز استعمال ممنوع ہے۔

معلوم ہوا ہے کہ شارجہ ایئرپورٹ پر مکمل ممنوعہ اشیاء جو ہینڈ بیگ ہو یا چیکڈ بیگ میں ہر صورت میں لے جانا منع ہیں ان میں لاٹھیاں، بیس بال بیٹ، آتش گیر گیس جیسے گیس کارٹریج، گیس لائٹر، پانی لگنے پر خطرناک اشیاء (کیلشیم، کیلشیم کاربائیڈ وغیرہ)، آتش گیر اشیاء (ماچس، سلفر، میٹل کیٹالسٹ)، کیمیکل یا بایولوجیکل خطرناک مواد (سلفر، وائرس، بایولوجیکل ایجنٹس)، آتش گیر مائعات جیسے پینٹ، پٹرول، انک، ہائی پروف الکحل، اسلحہ جیسے پستول، فلیئر گن، چھریاں (6 سینٹی میٹر یا اس سے لمبی بلیڈ والی) اور دیگر غیر قانونی چھریاں، آکسیڈائزر (بلیچ، امونیم نائٹریٹ وغیرہ)، نان فلیم ایبل گیسز (ڈائیونگ ٹینک، آکسیجن سلنڈر)، تابکاری مواد (ریڈیو ایکٹیو اشیاء مختلف درجہ بندی کے ساتھ)، زہریلی گیسز (کاربن مونو آکسائیڈ، امونیا)، متعدی بیماریاں (وائرس، بیکٹیریا، میڈیکل ویسٹ)، دھماکہ خیز مواد (آتش بازی، فلیئر، بارود)، خطرناک سامان (پولیمیرک بیڈز، انجنز)، مشتبہ اشیاء (ایسی چیزیں جو ہتھیار جیسی دکھائی دیں)، ہتھیار جیسی اشیاء (آئس پِک، کھلونا ہتھیار، استرا، بڑی قینچیاں)، معذور کرنے والی اشیاء (ٹیئر گیس، الیکٹرونک شاک ڈیوائسز) اور آرگینک پر آکسائیڈ شامل ہیں۔

علاوہ ازیں محدود اشیاء جو شرائط کے ساتھ لے جانے کی اجازت ہے ان میں مائع اشیاء 100ml تک فی بوتل، زیادہ سے زیادہ ایک لیٹر، شفاف اور دوبارہ بند ہونے والی 20x20cm پلاسٹک بیگ میں رکھ کر الگ سے دکھانا ہوگا، ادویات اور خاص خوراک میں بچوں کے لیے خوراک اور دوائیاں الگ رکھیں، نسخہ یا ڈاکٹر کا لیٹر لازمی ہوگا کیوں کہ ایسا سامان جو سفر میں ممنوعہ اشیاء یا غیر ضروری ہے جو سفر کو غیر محفوظ بناسکتا ہو مسافر کے لئے مشکلات پیدا کرسکتا ہے لہٰذا پہلے سے تیاری اور دوبارہ چیک کرکے سامان کا پیک کرنے یا ساتھ لے جانے کا مشورہ دیا گیا ہے، سفر سے پہلے ہمیشہ اپنی ایئرلائن سے اپڈیٹڈ ہدایات ضرور حاصل کی جائیں کیوں کہ کچھ قوانین مخصوص ایئرلائنز کے لیے مختلف ہوسکتے ہیں، مزید معلومات کے لیے متحدہ عرب امارات کی سرکاری ایوی ایشن ویب سائٹس یا متعلقہ ایئرپورٹ اتھارٹی سے رجوع کریں۔