فیڈریشن آف پاکستان چیمبرز آف کامرس کا گیس کے اضافی بل مستر د کردیئے

سوئی ناردرن گیس کی جانب سے صنعتوں کو بھجوائے گئے 75 ارب روپے کے بل واپس نہ لیے گئے تو کاوربار بند کردیں گے.ریجنل چیئرمین

میاں محمد ندیم پیر 11 اگست 2025 17:10

فیڈریشن آف پاکستان چیمبرز آف کامرس کا گیس کے اضافی بل مستر د کردیئے

لاہور(اردوپوائنٹ اخبارتازہ ترین-انٹرنیشنل پریس ایجنسی۔11 اگست ۔2025 )فیڈریشن آف پاکستان چیمبرز آف کامرس اینڈ انڈسٹریز (ایف پی سی سی آئی) نے سوئی ناردرن گیس کی جانب سے صنعتوں کو بھجوائے گئے 75 ارب روپے کے بل مسترد کردیے ہیں صدر ایف پی سی سی آئی نے فوری طور پر وزیراعظم اور متعلقہ افراد سے نوٹس لینے کا مطالبہ کرتے ہوئے فوری ایکشن نا لینے پر کاروباربند کرنے کی دھمکی دی ہے.

(جاری ہے)

لاہورمیں پریس کانفرنس کرتے ہوئے ایف پی سی سی آئی ریجنل چیئرمین زین افتخار نے کہا کہ قانون کے مطابق جو بل ادا ہو چکے ہیں وہ دوبارہ نہیں لیے جا سکتے، صنعتوں کا پہلے ہی پہیہ جام ہے اب ایک بار پھر ظلم کیا جا رہا ہے نائب صدر ایف پی سی سی آئی ذکی اعجاز نے کہا کہ پہلے ہم نے ایف بی آر کے ٹیکس آرڈیننس کے خلاف جنگ جیتی، اب ایک بار پھر سوئی گیس نے صنعتوں پر حملہ کیا ہے، ایس آئی ایف سی اور وزیراعظم فوری طور پر نوٹس لے کر آج ہی اس معاملے کا حل نکالیں. انہوں نے کہا کہ حکومت نے ہماری بات نا سنی تو پھر ہم آئندہ سخت اقدام اٹھانے پر مجبور ہو جائیں گے، اوگرا اور سوئی گیس کے اندرونی معاملے کا خمیازہ ہم کیوں بھگتیں؟ ہمیں پہلے اس معاملے سے آگاہ بھی نہیں کیا گیا تھا انہوں نے کہا کہ آرمی چیف کی معاشی پالیسیوں کے خلاف یہ سارے محکمے کام کر رہے ہیں.