سیالکوٹ، اقلیتوں کے قومی دن کی مناسبت سے سیمینار، مختلف مذاہب کے نمائندوں کی شرکت

پیر 11 اگست 2025 18:22

سیالکوٹ (اُردو پوائنٹ اخبارتازہ ترین - اے پی پی۔ 11 اگست2025ء) وزیر اعلیٰ پنجاب مریم نواز شریف کی خصوصی ہدایت پر 11 اگست کو اقلیتوں کے قومی دن کے موقع پر سوشل ویلفیئر کمپلیکس سیالکوٹ میں ایک شاندار سیمینار منعقد ہوا جس میں مختلف مذاہب اور مکاتب فکر کے نمائندوں نے بھرپور شرکت کی۔ تقریب کی صدارت ڈپٹی ڈائریکٹر سوشل ویلفیئر شریف گھمن نے کی جبکہ سردار جسکرن سنگھ، حکیم رتن کال، بشپ شمشاد گل، اعجاز نوری، اشفاق نذر گھمن، مرزا عبدالشکور، پیر غلام حسین سلطانی، شمائلہ افتخار و دیگر نے خطاب کیا۔

تقریب میں شادی لال، سائیں داو، خرم شہزاد، پادری ولسن، حکیم عارف حسین، مختار احمد، شہباز مغل، حافظ سیف اللہ، شاہد اسحق سمیت اقلیتوں کے عمائدین اور نمائندے شریک ہوئے۔

(جاری ہے)

مقررین نے اپنی تقاریر میں قائداعظم محمد علی جناح کے 11 اگست 1947ء کے تاریخی خطاب کو یاد کیا اور اس پیغام کو دہراتے ہوئے کہا کہ "آپ آزاد ہیں، آپ آزاد ہیں کہ اپنے مندروں میں جائیں، آپ آزاد ہیں کہ اپنی مساجد میں جائیں، یا کسی اور عبادت گاہ میں، اس ریاستِ پاکستان میں آپ کا تعلق خواہ کسی مذہب، ذات یا عقیدے سے ہو، اس کا ریاست کے امور سے کوئی تعلق نہیں۔

شریف گھمن نے کہا کہ قائد کا یہ ویژن آج بھی پاکستان کی اساس ہے اور وزیر اعلیٰ پنجاب کی جانب سے منیارٹی کارڈ کا اجراء اسی ویژن کی عملی تصویر ہے جو اقلیتوں کو مساوی حقوق اور سہولتوں کے حصول میں مدد فراہم کرے گا۔ انہوں نے اس بات پر زور دیا کہ پاکستان تمام اقلیتوں کے لیے ایک محفوظ اور پرامن وطن ہے، جہاں مذہبی رواداری اور باہمی احترام کو فروغ دیا جا رہا ہے۔ سیمینار کے اختتام پر قومی یکجہتی، مذہبی ہم آہنگی اور ملک کی ترقی و خوشحالی کے لیے دعا کی گئی۔