گوجرانوالہ،کمسن گھریلو ملازمہ تشدد کے بعد قتل، معروف تاجر اور بیٹے سمیت 4 افراد پر مقدمہ درج

پیر 11 اگست 2025 21:51

گوجرانوالہ (اُردو پوائنٹ اخبارتازہ ترین - این این آئی۔ 11 اگست2025ء)گوجرانوالہ کے علاقے ماڈل ٹاؤن میں معروف تاجر کے گھر ملازمت کرنے والی کمسن بچی کو مبینہ تشدد کے بعد قتل کردیا گیا، پولیس نے معروف تاجر اور اس کے بیٹے سمیت 4 افراد کے خلاف مقدمہ درج کرلیا۔پولیس کے مطابق کمسن بچی معروف تاجر مقبول احمد کے گھر ملازمہ تھی اور 10 ہزار روپے ماہانہ تنخواہ پر کام کر رہی تھی، واقعے کے بعد ملزمان نے بچی کی لاش اٴْس کے گھر بھجوا دی۔

(جاری ہے)

پولیس کے مطابق ورثا نے جسم پر تشدد کے نشانات دیکھ کر پولیس کو اطلاع دی، جس پر پولیس نے لاش کو تحویل میں لے کر پوسٹ مارٹم کے لیے ہسپتال منتقل کر دیا۔ابتدائی رپورٹ میں بچی پر تشدد ثابت ہوا ہے، ماڈل ٹاؤن پولیس نے تاجر مقبول احمد اور اس کے بیٹے کو حراست میں لے لیا ہے، ورثا نے الزام عائد کیا ہے کہ بچی کو بے رحمی سے قتل کیا گیا، ہمیں انصاف چاہیے۔پولیس کے مطابق مزید تفتیش شروع کر دی گئی، ملزمان کو قانون کے مطابق سخت سزا دلائی جائے گی، ماڈل ٹاؤن پولیس نے مقدمہ درج کر کے تفتیش شروع کردی۔