اسلام آباد میں انٹرنیشنل میعار کا کرکٹ سٹیڈیم بننے کو تیار، F9 پارک تعمیر کیلئے منتخب

سٹیڈیم ڈیزائن اور تکنیکی پہلوؤں کے حوالے سے سابق کپتان راشد لطیف سی ڈی اے کو معاونت فراہم کریں گے : ذرائع

ذیشان مہتاب منگل 12 اگست 2025 12:41

اسلام آباد میں انٹرنیشنل میعار کا کرکٹ سٹیڈیم بننے کو تیار، F9 پارک ..

اسلام آباد (اردو پوائنٹ تازہ ترین اخبار ۔ 12 اگست 2025ء ) اسلام آباد میں انٹرنیشنل لیول کا کرکٹ اسٹیڈیم بننے کو تیار ہے۔

ذرائع کے مطابق سی ڈی اے نے ایف نائن پارک کو کرکٹ اسٹیڈیم کی تعمیر کے لیے منتخب کرلیا ہے اور اس سلسلے میں سی ڈی اے نے ماہرانہ رائے کے لیے راشد لطیف کو آن بورڈ لے لیا ہے۔

ذرائع کا بتانا ہے کہ اسٹیڈیم ڈیزائن اور تکنیکی پہلوؤں کے حوالے سے 54 سالہ راشد لطیف سی ڈی اے کو معاونت فراہم کریں گے، راشد لطیف نے اس سے قبل اسلام آباد کلب کی تعمیر میں اہم کردار ادا کیا تھا۔

(جاری ہے)

گرین ایریا پر سپریم کورٹ کے فیصلے کے باعث کرکٹ اسٹیڈیم کی تعمیر کے لیے قانونی رکاوٹوں کو بھی دیکھا جائیگا۔

ذرائع کے مطابق کرکٹ اسٹیڈیم میں بیشتر حصے کو گرین ایریا رکھنے کی تجویز زیر غور ہے جس کے تحت جنوبی افریقا اور ویسٹ انڈیز میں کرکٹ اسٹیڈیمز کی طرح چند انکلوژرز میں گرین ایریا رکھا جائیگا۔

ذرائع کا کہنا ہے کہ سی ڈی اے کی جانب سے کرکٹ اسٹیڈیم کی تعمیر کی کلئیرنس کے لیے سپریم کورٹ سے بھی رجوع کیا جاسکتا ہے۔

اس سے قبل سپریم کورٹ نے شکرپڑیاں میں کرکٹ اسٹیڈیم کی تعمیر کو روک دیا تھا۔