Live Updates

شائقین کرکٹ کا بابراعظم کی قومی ٹیم میں واپسی کا مطالبہ زور پکڑ گیا

منگل 30 ستمبر 2025 13:13

لاہور(اُردو پوائنٹ اخبارتازہ ترین - این این آئی۔ 30 ستمبر2025ء)ایشیا کپ فائنل میں بھارت کے ہاتھوں شکست کے بعد پاکستانی شائقین کرکٹ کی جانب سے سوشل میڈیا پر قومی ٹیم کے سابق کپتان بابراعظم کی اسکواڈ میں واپسی کا مطالبہ زور پکڑ گیا۔ایشیا کپ فائنل میں پاکستان نے پہلے بیٹنگ کرتے ہوئے صرف 146 رنز بنائے اور 19.1 اوورز میں پوری ٹیم ڈھیر ہوگئی۔ ایک موقع پر 113 کے اسکور پر صرف ایک کھلاڑی آؤٹ تھا مگر اچانک بیٹنگ لائن زمین بوس ہوگئی اور صرف 33 رنز کے اضافے پر 9 کھلاڑی پویلین لوٹ گئے، بھارت نے 147 رنز کا آسان ہدف 5 وکٹوں کے نقصان پر دو گیندیں قبل حاصل کرلیا۔

ٹورنامنٹ کے دوران ٹیم کا مڈل آرڈر بار بار ناکام ہوا، جس نے مداحوں میں شدید مایوسی پیدا کی اور قیادت میں تبدیلی کی بحث کو جنم دیا۔

(جاری ہے)

پاکستان کی بیٹنگ لائن کی ناقص کارکردگی کے بعد شائقین کو بابراعظم کی کمی شدت سے محسوس ہوئی، شکست کے فوراً بعد سوشل میڈیا پر کپتان اور مڈل آرڈر پر تنقید کا طوفان کھڑا ہوگیا۔ایک مداح نے لکھا کہ براہ کرم بابراعظم کو واپس لائیں، پاکستان کی کرکٹ ان کے بغیر نامکمل ہے، ایک اور صارف نے کہا کہ بابراعظم کی بہت یاد آرہی ہے۔معروف اسپورٹس صحافی سلیم خالق نے بھی بحث میں حصہ لیتے ہوئے کہا کہ بابراعظم کو واپس لائیں، اور شاہین آفریدی کو کپتان بنائیں۔