پاکستانی قوم کو ان کے 78 ویں یوم آزادی کے موقع پر مبارکباد پیش کرتا ہوں۔ ڈاکٹر رضا امیری مقدم

اسلامی جمہوریۂ ایران کی حکومت و عوام کی طرف سے اسلامی جمہوریۂ پاکستان کی قابل احترام حکومت اور معزز، برادر، دوست مملکت کی بقا و سلامتی کے لئے نیک خواہشات کا اظہار۔ ایرانی سفیر

عمر جمشید بدھ 13 اگست 2025 18:17

پاکستانی قوم کو ان کے 78 ویں یوم آزادی کے موقع پر مبارکباد پیش کرتا ہوں۔ ..

لاہور (اُردو پوائنٹ اخبارتازہ ترین۔ 13 اگست2025ء) پاکستان میں تعینات ایران کے سفیر ڈاکٹر رضا امیری مقدم کی جانب سے یوم آزادی کے تہنیتی پیغام میں سفارتخانہ اسلامی جمہوریہ ایران کی جانب سے پریس ریلیز میں کہا گیا کہ 14 اگست کے مبارک دن، جب عظیم پاکستانی قوم آزادی کی 78ویں سالگرہ نہایت جوش و خروش سے منا رہی ہے، میں اپنی جانب سے اور اسلامی جمہوریۂ ایران کی حکومت و عوام کی طرف سے اسلامی جمہوریۂ پاکستان کی قابل احترام حکومت اور معزز، برادر، دوست اور ہمسایہ قوم کو دل کی اتھا گہرائیوں سے مبارکباد پیش کرتا ہوں۔

یہ دن اس عظیم قوم کی اعلیٰ اقدار کو خراجِ تحسین پیش کرنے کا دن ہے، اور ہمیں فخر ہے کہ ہم پاکستان کی ناقابلِ تسخیر استقامت، اتحاد اور شاندار کامیابیوں کا جشن منا رہے ہیں۔

(جاری ہے)

ہم ایران اور پاکستان کے مابین موجود دوستی، باہمی احترام اور تعاون کے مضبوط رشتوں کو بے حد عزیز رکھتے ہیں۔ دونوں ممالک کی اعلیٰ قیادت کے پختہ عزم اور دونوں جانب کے تمام شعبوں کی مخلصانہ کاوشوں کے نتیجے میں ہمارے تعلقات ایک نئے اور امید افزا دور میں داخل ہو چکے ہیں—ایسا دور جو امن کی جستجو کے درمیان تعلقات کو ایک تاریخی موڑ پر لے آیا ہے۔

ہم پاکستان کی خوشحالی، سلامتی، ترقی اور استحکام کے لیے ہمیشہ دعا گو ہیں اور چاہتے ہیں کہ ہماری دونوں برادر اقوام کے مابین پائیدار دوستی مزید گہری اور مضبوط ہو۔

پاکستان میں اسلامی جمہوریۂ ایران کے سفیر کی حیثیت سے، میں اپنے عوام کی باہمی خوش حالی اور فلاح کے لیے تعلقات کو مزید مستحکم بنانے کے عزم کا اعادہ کرتا ہوں۔

ایک بار پھر، 14 اگست کے اس پرمسرت موقع پر، مجھے آپ سب کو پاکستان کے یومِ آزادی کی 78ویں سالگرہ کی دلی مبارکباد پیش کرنے میں بے حد مسرت ہو رہی ہے۔