سی پی او راولپنڈی کی سربراہی میں یوم آزادی کے سکیورٹی انتظامات کے حوالے سے اہم اجلاس

بدھ 13 اگست 2025 20:20

راولپنڈی (اُردو پوائنٹ اخبارتازہ ترین - اے پی پی۔ 13 اگست2025ء) سی پی او سید خالد ہمدانی کی سربراہی میں پولیس ہیڈکوارٹرز میں یوم آزادی کے سکیورٹی انتظامات کے حوالے سے اجلاس منعقد ہوا ۔اس موقع پر ایس ایس پی آپریشنز، ایس ایس پی انوسٹیگیشن، چیف ٹریفک آفیسر، ڈویژنل ایس پیز، ایس پی سی آئی اے، ایس پی سکیورٹی، ڈی ایس پی ہیڈکوارٹرز اور ایس ڈی پی اوز نے شرکت کی۔

سی پی او سید خالد ہمدانی کا کہنا تھا کہ 4500 سے زائد افسران سکیورٹی فرائض سرانجام دیں گے، ٹریفک مینجمنٹ کے لئے 350 سے زائد افسران فرائض سرانجام دیں گے، رش والے اور اہم مقامات کے لئے خصوصی سکیورٹی انتظامات کئے گئے ہیں، ایلیٹ کمانڈوز کی 15 خصوصی سکواڈ سڑکوں پر گشت کے فرائض سرانجام دیں گے، ون ویلنگ کی روک تھام کے لئے 50 سے زائد خصوصی پکٹس لگائی جائیں گی، سیف سٹی کیمروں سے مانیٹرنگ کی جائے گی، ٹریفک پولیس کا خصوصی سکواڈ بھی ون ویلنگ یا ہلڑ بازی پر کنٹرول کے لئے کام کرے گا، ٹریفک میں خلل، ون ویلنگ، ہلڑبازی کسی صورت برداشت نہیں کی جائیگی، تھانوں کی موبائلز اپنے اپنے علاقوں میں گشت کے فرائض سر انجام دیں گی،ہوائی فائرنگ، آتش بازی، ون ویلنگ یا ہلڑ بازی کے خلاف فوری قانونی کارروائی عمل میں لائی جائے گی۔

(جاری ہے)

انہوں نے کہا کہ یوم آزادی کے موقع پر بہترین سکیورٹی انتظامات کو یقینی بنایا جائے گا، شہری یوم آزادی کی تقریبات مکمل جوش و جذبے سے منائیں تاہم قانون کی خلاف ورزی برداشت نہیں کی جائے گی، والدین اپنے بچوں پر نظر رکھیں اور ون ویلنگ جیسے افعال کی حوصلہ شکنی میں اپنا کردار ادا کریں۔