پاکستان کے یوم آزادی کے موقع پر گوگل نے ڈوڈل جاری کردیا

اسلام آباد(اُردو پوائنٹ اخبارتازہ ترین - این این آئی۔ 14 اگست2025ء)انٹرنیٹ سرچ انجن گوگل نے پاکستان کے 78 ویں یوم آزادی پر نیا ڈوڈل جاری کرتے ہوئے اپنی سالانہ روایت کو برقرار رکھا۔گوگل ہر سال یوم آزادی کے موقع پر نیا ڈوڈل جاری کرتا آیا ہے، علاوہ ازیں گوگل پاکستان کے اہم ترین دوسرے دنوں اور واقعات پر بھی خصوصی ڈوڈل جاری کرتا آیا ہے۔گوگل ڈوڈل (Google Doodle) سرچ انجن گوگل کے ہوم پیج پر موجود وہ خصوصی، عارضی لوگو ہوتا ہے جو اہم تاریخی، ثقافتی، عالمی واقعات، تعطیلات، یا مشہور شخصیات کی یاد منانے کے لیے ڈیزائن کیا جاتا ہے۔

مذکورہ ڈوڈل عام طور پر گوگل کے اصل لوگو کی جگہ لیتا ہے، عارضی طور پر گوگل کا اپنا لوگ معطل کردیا جاتا ہے۔گوگل ڈوڈل میں تصاویر، اینیمیشنز، ویڈیوز، یا انٹرایکٹو گیمز شامل ہو سکتے ہیں، جسے کلک کرنے پر اس کی مزید تفصیلات معلوم کی جا سکتی ہیں۔

(جاری ہے)

رواں برس گوگل نے پاکستان کے یوم آزادی پر ڈوڈل جاری کرتے ہوئے اپنے نوٹ میں بتایا کہ پاکستان 14 اگست 2025 کو اپنی آزادی کی 78ویں سالگرہ منا رہا ہے۔

نوٹ میں بتایا گیا کہ 14 اگست کے تاریخی دن سن 1947 میں پاکستان نے تقریباً 200 سالہ غیر ملکی اقتدار سے آزادی حاصل کر کے ایک خودمختار ریاست کی حیثیت اختیار کی تھی۔نوٹ کے مطابق سال 1947 کے ایکٹ آف انڈیپنڈنس کے بعد برصغیر کے مسلمانوں نے اپنی الگ آزاد قومی ریاست کے قیام کے لیے پاکستان تحریک کا آغاز کیا، اس تحریک کی قیادت آل انڈیا مسلم لیگ نے کی، جس کے سربراہ قائداعظم محمد علی جناح تھے، ان کی انتھک جدوجہد نے پاکستان کے قیام کا خواب شرمندہ تعبیر کیا۔

گوگل نے ڈوڈل جاری کرتے ہوئے اپنے نوٹ میں بتایا کہ پاکستان میں یومِ آزادی کے جشن کا آغاز دارالحکومت اسلام آباد میں 31 توپوں کی سلامی سے ہوتا ہے، جس کے بعد صدارتی اور پارلیمانی عمارات پر پرچم کشائی کی تقریبات منعقد کی جاتی ہیں۔سیاسی رہنما قومی ترقی اور پیش رفت پر تقاریر کرتے ہیں، جنہیں ٹیلی ویڑن پر براہِ راست نشر کیا جاتا ہے۔ملک بھر میں پریڈز، آتش بازی، محب وطن میوزک کنسرٹس اور ایوارڈز کی تقریبات کا اہتمام بھی کیا جاتا ہے، جو پاکستانی قوم کے جذبے اور اتحاد کی عکاسی کرتی ہیں۔یہ دن ہر پاکستانی کے لیے فخر اور عزم کی تجدید کا موقع ہے کہ وہ اپنے وطن کی ترقی اور خوشحالی کے لیے اپنا کردار ادا کریں۔