صوبائی وزیرصحت کی زیرصدارت نواز شریف میڈیکل ڈسٹرکٹ کے بارے اجلاس

لاہور (اُردو پوائنٹ اخبارتازہ ترین - اے پی پی۔ 15 اگست2025ء) صوبائی وزیرصحت خواجہ سلمان رفیق اور سیکرٹری صحت عظمت محمودخان کی زیرصدارت محکمہ سپیشلائزڈہیلتھ کیئراینڈمیڈیکل ایجوکیشن میں نواز شریف میڈیکل ڈسٹرکٹ کے حوالے سے اہم اجلاس منعقدہوا جس میں وڈیولنک کے ذریعے ڈاکٹرعدنان خان، چیئرمین وزیراعلی پنجاب ایڈوائزری کمیٹی برائے امراض قلب ڈاکٹرفرقدعالمگیر،وائس چانسلر یونیورسٹی آف ہیلتھ سائنسزپروفیسراحسن وحیدراٹھور اور وائس چانسلر راولپنڈی میڈیکل یونیورسٹی پروفیسرمحمد عمر نے شرکت کی۔

اجلاس میں سپیشل سیکرٹری ڈویلپمنٹ ذیشان شبیررانا،وائس چانسلر کنگ ایڈورڈمیڈیکل یونیورسٹی،وائس چانسلر یونیورسٹی آف چائلڈہیلتھ سائنسز پروفیسر مسعود صادق،چیف پلاننگ آفیسرعبدالحق بھٹی،پرنسپل علامہ اقبال میڈیکل کالج پروفیسر طیبہ وسیم،ایڈیشنل سیکرٹری امیرمحمد،پروفیسرعنبرین انور،ڈاکٹرممریز،آئی ڈیپ کے افسران و دیگرافسران نے بھی شرکت کی۔

(جاری ہے)

اجلاس کے دوران نواز شریف میڈیکل ڈسٹرکٹ کے پراجیکٹ کا تفصیلی جائزہ لیاگیا۔صوبائی وزیرصحت نے کہاکہ وزیراعلی پنجاب کے ویژن کے مطابق حکومت صحت کے شعبہ میں اربوں روپوں کے انقلابی اور تاریخی اقدامات اٹھارہی ہے،نواز شریف میڈیکل ڈسٹرکٹ پراجیکٹ کے تحت لاہورمیں چلڈرن ہسپتال 2اینڈانسٹیٹیوٹ آف جنیٹک اینڈبلڈ ڈیزیزز، انسٹیٹیوٹ آف سرجیکل، آرتھوپیڈک اینڈمیڈیکل ری ہیبلی ٹیشن، سنٹرآف ایکسی لینس فارنرسنگ ایجوکیشن، سپیشلائزڈمیڈیکل ہسپتال، کارڈیک ہسپتال، میڈیکل یونیورسٹی اور اسٹیٹ آف دی آرٹ ڈائیگناسٹک لیب بنائی جائے گی۔

خواجہ سلمان رفیق نے کہاکہ حکومت پنجاب صوبہ بھرمیں نئے سرکاری ہسپتالوں کا جال بچھارہی اورعوام کو ان کی دہلیزپرصحت کی بہترین سہولیات کی فراہمی وزیراعلی کی اولین ترجیح ہے،مریم نوازچاہتی ہیں کہ عوام کو صحت کی سہولیات میں کسی قسم کی پریشانی کا سامنانہ کرناپڑے۔صوبائی وزیر نے آئی ڈیپ کو صحت کے تمام نئے پراجیکٹس پر تیزی سے کام شروع کرنے کی ہدایت کی۔سیکرٹری محکمہ سپیشلائزڈہیلتھ کیئراینڈمیڈیکل ایجوکیشن عظمت محمود خان نے کہاکہ متعلقہ افسران نواز شریف میڈیکل ڈسٹرکٹ پراجیکٹ کو مسلسل مانیٹرکررہے ہیں۔