چیئرمین کابینہ کمیٹی برائے امن و امان خواجہ سلمان رفیق کا محکمہ داخلہ کے مرکزی کنٹرول روم کا دورہ

حضرت امام حسینؓ ، رفقا کے چہلم ،عرس داتا علی ہجویری ؒ کے انتظامات کا جائزہ ‘سیکرٹری داخلہ کی سکیورٹی انتظامات بارے بریفنگ

جمعہ 15 اگست 2025 18:00

لاہور (اُردو پوائنٹ اخبارتازہ ترین - این این آئی۔ 15 اگست2025ء)حضرت امام حسینؓ ، رفقا کے چہلم اور عرس داتا علی ہجویری ؒ کے انتظامات کا جائزہ لینے کیلئے صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے محکمہ داخلہ کے مرکزی کنٹرول روم کا دورہ کیا۔ قائم مقام چیف سیکرٹری پنجاب احمد رضا سرور، سیکرٹری داخلہ پنجاب ڈاکٹر احمد جاوید قاضی،سپیشل سیکرٹری لا اینڈ آرڈر وزیراعلیٰ آفس سیف انور جپہ اور ایڈیشنل آئی جی پنجاب طارق چوہان بھی اس موقع پر موجود تھے۔

صوبائی وزیر نے کنٹرول روم سے صوبہ بھر میں جاری جلوسوں و مجالس اور عرس کی لائیو مانیٹرنگ کا جائزہ لیا۔سیکرٹری داخلہ ڈاکٹر احمد جاوید قاضی نے صوبہ بھر کے سکیورٹی انتظامات بارے بریفنگ دی۔

(جاری ہے)

خواجہ سلمان رفیق اور قائم مقام چیف سیکرٹری نے پنجاب بھر کے کنٹرول رومز میں فرداً فرداً رابطہ کیا اور رپورٹ لی۔صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے کہاکہ وزیر اعلیٰ پنجاب مریم نواز شریف کی ہدایت پر امن و امان کا قیام حکومت کی اولین ترجیح ہے۔

حکومت پنجاب چہلم و عرس کے موقع پر سکیورٹی و دیگر فول پروف انتظامات یقینی بنا رہی ہے۔ پنجاب میں تمام مکاتب فکر کو مکمل مذہبی آزادی حاصل ہے اور تمام لوگوں کی حفاظت ریاست کی اہم ذمہ داری ہے۔خواجہ سلمان رفیق نے کہاکہ علمائے کرام اور تمام اسٹیک ہولڈرز سے مستقل رابطے میں ہیں۔باہمی اتفاق و یگانگت کیساتھ چہلم و عرس کو پرامن انداز میں عقیدت و احترام سے منا رہے ہیں۔

تمام اسٹیک ہولڈرز سکیورٹی تقاضوں کو پورا کرتے ہوئے چہلم حضرت امام حسینؓ اور عرس کے تقدس کو یقینی بنائیں۔قائم مقام چیف سیکرٹری پنجاب احمد رضا سرورنے کہاکہ انتظامیہ، پولیس، محکمہ صحت، ریسکیو 1122، ٹریفک تمام ادارے فیلڈ میں پوری طرح مستعد ہیں۔محکمہ داخلہ کا سائبر پٹرولنگ سیل فرقہ واریت میں ملوث افراد کیخلاف ایکشن لے رہا ہے۔قائم مقام چیف سیکرٹری پنجاب نے کہاکہ تمام عزاداروں اور زائرین کی بحفاظت واپسی تک ڈیوٹی پر مامور تمام عملہ فیلڈ میں مستعد رہے۔

سیکرٹری داخلہ پنجاب ڈاکٹر احمد جاوید قاضی نے کہاکہ سوشل میڈیا پر فرقہ واریت پھیلانے والوں کے خلاف زیرو ٹالرینس پالیسی پر عمل پیرا ہیں۔محکمہ داخلہ پنجاب کے جاری کردہ قواعد و ضوابط پر من وعن عملدرآمد یقینی بنایا جائے۔