خیبرپختونخوا، گلگت بلتستان، آزاد کشمیر میں کلاؤڈ برسٹ اور سیلابی ریلوں سے تباہی، 164 افراد جاں بحق

گلگت /مظفر آباد /اسلام آباد /پشاور /بونیر (اُردو پوائنٹ اخبارتازہ ترین - این این آئی۔ 15 اگست2025ء)صوبہ خیبر پختونخوا، گلگت بلتستان اور آزاد کشمیر میں طوفانی بارشوں، کلاؤڈ برسٹ، لینڈ سلائیڈنگ اور سیلابی ریلوں نے بڑے پیمانے پر تباہی مچادی جس کے باعث مختلف حادثات میں 164 افراد جاں بحق ، متعدد زخمی اور کئی لاپتہ ہوگئے ۔خیبر پختونخوا میں کلاؤڈ برسٹ، بارشوں اور سیلابی ریلوں سے ہونے والے نقصانات کی تفصیلات سے متعلق پی ڈی ایم اے کی رپورٹ کے مطابق صوبے میں اموات کی تعداد 146 سے تجاوز کرگئی۔

پی ڈی ایم اے کے مطابق سب سے زیادہ نقصان ضلع بونیر میں ہوا، بونیر کے 12 سے زیادہ دیہات کلاؤڈ برسٹ سے شدید متاثر ہوئے۔صوبائی ڈیزاسٹر مینجمنٹ اتھارٹی کے مطابق بارش، کلاؤڈ برسٹ اور فلیش فلڈ کے باعث 60 سے زائد افراد زخمی ہوئے۔

(جاری ہے)

بونیر، باجوڑ، مانسہرہ اور بٹگرام آفت زدہ اضلاع قرار دے دیے گئے ہیں۔ پی ڈی ایم اے کے مطابق متاثرہ اضلاع میں ریسکیو ٹیموں کی تعداد میں مذید اضافہ کردیا گیا ، امدادی سرگرمیاں تیز کر دی گئیں، صوبائی ہیلی کاپٹر بھی استعمال ہو تا رہا ۔

رپورٹ کے مطابق ضلع مانسہرہ کے علاقے بٹگرام میں رات گئے کلاؤڈ برسٹ سے متعدد افراد ریلے میں بہہ گئے۔ پولیس کے مطابق علاقے میں کئی مکانات تباہ اور بڑی تعداد میں مال مویشی بھی سیلابی ریلے میں بہہ گئے جن کی تلاش کا کام جاری رہا ۔پی ڈی ایم اے کے مطابق حادثات سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے، بارشوں کے باعث مجموعی طور پر 30 گھروں کو نقصان پہنچا، 25 گھروں کو جزوی جبکہ 5 گھر مکمل تباہ ہوئے،سب سے زیادہ متاثرہ اضلاع باجوڑ اور بٹگرام ہیں جن میں ریسکیو آپریشن تیز کر دیا گیا ۔

پی ڈی ایم اے کے مطابق کے پی میں شدید بارشوں کا سلسلہ 21 اگست تک وقفے وقفے سے جاری رہنے کا امکان ہے۔ضلع بونیر کے علاقے پیر بابا اور گردونواح میں بھی شدید بارشوں سے ندی نالوں میں طغیانی آگئی ۔ڈپٹی کمشنر بونیر کاشف قیوم کے مطابق طوفانی بارشوں اور سیلابی ریلوں کے نیتجے میں 75 افراد جاں بحق ہوئے ہیں۔دوسری جانب میڈیکل آفیسر ڈاکٹر امتیاز نے بتایا کہ اب تک 43 لاشیں پیر بابا ہسپتال لائی جا چکی ہیں، ہسپتال میں 25 خواتین اور 18 بچوں کی لاشیں لائی گئی ہیں۔

پاک فوج کی جانب سے سوات اور باجوڑ میں سیلاب سے متاثرہ اضلاع میں ریلیف آپریشن کیا گیا۔پاک فوج کی ٹیمیں متاثرہ علاقوں سے لوگوں کو محفوظ مقامات پر منتقل کرتی رہیں ،باجوڑ میں ہیلی کاپٹر کے ذریعے لوگوں کو ریسکیو کیا گیا، راشن اور ادویات فراہمی بھی بذریعہ ہیلی کاپٹر کی جاتی رہی ۔دوسری جانب آزاد کشمیر کے مختلف علاقوں میں بھی طوفانی بارشوں نے تباہی مچادی،مختلف واقعات میں 8 افراد جاں بحق ہوئے جن میں مظفرآباد کے ایک ہی خاندان کے 6 افراد بھی شامل ہیں۔

کلاؤڈ برسٹ سے رتی گلی کی سڑک مختلف مقامات سے بہہ گئی، رتی گلی بیس کیمپ میں متعدد سیاح پھنسے ہوئے ہیں۔نیلم اور لوات نالے پر تین، تین رابطہ پل بہہ گئے، آزاد کشمیر کو راولپنڈی سے ملانے والی شاہراہ کوہالہ لینڈ سلائیڈنگ کے باعث بند ہے، مختلف مقامات پر 30 سے زائد مکانات، دکانیں اور دیگر املاک تباہ ہوئیں،خراب موسم کے باعث سیاحوں کو واپس جانے سے روک دیا گیا ہے۔

وزیر اطلاعات آزاد کشمیر مظہر سعید کے مطابق سیاحتی مقام رتی گلی میں 500 سے زائد سیاح پھنسے ہوئے ہیں، تمام سیاح محفوظ ہیں،آٹھ مقام میں لینڈ سلائیڈنگ کے باعث متعدد رابطہ سڑکیں بند جبکہ شاہراہ نیلم پر ٹریفک کی آمد و رفت متاثر ہوئی۔خیال رہے کہ بالائی علاقوں میں بجلی اور فون کا نظام بھی متاثر ہوا۔بارش اور لینڈ سلائیڈنگ کے پیش نظر متاثرہ اضلاع میں جمعہ اور ہفتہ کو تمام سرکاری اور نجی اسکول بند رکھنے کا فیصلہ کیاگیا ،ادھر گلگت بلتستان میں مختلف حادثات میں 10 افراد جاں بحق ہو گئے۔

غذر میں سیلاب سے 8 افراد جاں بحق ہوئے اور ضلع دیامر میں 2 بہن بھائی جاں بحق ہوئے۔مرکزی بجلی گھر نلتر اسٹیشن سیلاب کے باعث تباہ ہو گیا، پاور اسٹیشن بند ہونے سے شہر تاریکی میں ڈوب گیا۔گلگت بلتستان کی حکومت کے ترجمان کے مطابق سیلاب سے متاثرہ سڑکوں کی بحالی کا کام تیز کر دیا گیا، سیلاب متاثرہ علاقوں میں امدادی کارروائیاں جاری رہیں۔ہنزہ میں شیشپر گلیشیئر پگھلنے سے حسن آباد نالے کے دونوں اطراف سے کٹاؤ کا سلسلہ جاری رہا۔انتظامیہ نے مکانوں کو خالی کرنے کا نوٹس دے دیا ہے۔