کے آر ایم نے ڈمپر سے شہریوں ہلاکت کے خلاف درخواست دائر کردی

ڈمپر مافیا سے شہریوں کو بچانے میں بھی بری طرح ناکام ہوگئے،درخواست میںموقف

جمعہ 15 اگست 2025 19:43

کراچی(اُردو پوائنٹ اخبارتازہ ترین - این این آئی۔ 15 اگست2025ء)شہر قائدکے مکینوں کی ڈمپر مافیا کے ہاتھوں ہلاکتوں کیخلاف سندھ ہائیکورٹ میں درخواست دائر کردی گئی ہے تحریک بحالی کراچی (کراچی ریسٹوریشن موومنٹ یا کے آر ایم)کے کنوینراشرف جبار قریشی و دیگر اراکین کی جانب سے دائر درخواست میں موقف اختیار کیا گیا ہے کہ حکام کی آئینی ذمہ داری ہے کہ صوبہ سندھ کے شہریوں کی خدمت سے متعلق اپنے فرائض ذمہ داری سے ادا کریں لیکن فریقین صوبے میں پانی کی فراہمی، سیوریج، سڑکوں کی تعمیر اور امن و امان کے متعلق فرائض انجام نہیں دے سکے، فریقین ڈمپر مافیا سے شہریوں کو بچانے میں بھی بری طرح ناکام ہوگئے، 600 سے زائد ہلاکتیں اس کا ثبوت ہیں درخواست گذار کے مطابق سرکاری حکام جاں بحق ہونے والے شہریوں کے لواحقین کی اشک سوئی کے بجائے ڈمپر ایسوسی ایشن کے مبینہ نمائندوں سے ملاقاتیں کرتے ہیں ڈمپر چلانیوالے ڈرائیوروں کی اکثریت پاکستانی نہیں اور نہ ہی پاکستانی قوانین کی پابندی کرتے ہیں۔

(جاری ہے)

10 اگست کو راشد منہاس روڈ پر 2 بجے شب ڈمپر کی ٹکر سے 2 معصوم بہن بھائی ہلاک ہوئے، ڈمپر مافیا نے رات کے اس پہر دیگر جارح ڈمپر سمیت مبینہ طور پر سات ڈمپرز کو آگ لگا کر علاقے کے نوجوانوں پر الزام عائد کردیا اور اس پر مستزاد ڈمپر مافیا کے ایما پر پولیس نے درجن بھر نوجوانوں کو گرفتار بھی کرلیا۔ درخواست میں استدعا کی گئی ہے فریقین کو ہدایت کی جائے کہ وہ ڈمپرز کی رجسٹریشن اور فٹنس کے متعلق ریکارڈ پیش کریں اور سپریم کورٹ اور ہائیکورٹ کی جانب سے جاری احکامات پر عملدرآمد کرایا جائے۔ درخواست میں چیف سیکرٹری، ہوم سیکریٹری، آئی جی سندھ، ٹریفک امور سے متعلق ایڈیشنل آئی جی کو فریق بنایا گیا ہے۔