تارکین وطن گروپوں کا احتجاج ، بھارت میں اقلیتوں پر مظالم کی مذمت

ہفتہ 16 اگست 2025 12:02

لندن (اُردو پوائنٹ اخبارتازہ ترین - اے پی پی۔ 16 اگست2025ء) جنوبی ایشیاسے تعلق رکھنے والے تارکین وطن گروپوں نے بھارت میں اقلیتوں پر ظلم و ستم، بنگالی مسلمانوں کو نشانہ بنانے اور بھارت کے غیر قانونی زیرتسلط جموں و کشمیر میں دفعہ 370 کی منسوخی کے خلاف لندن میں احتجاج کیا۔کشمیرمیڈیاسروس کے مطابق جنوبی ایشیایکجہتی گروپ اور دیگر تارکین وطن تنظیموں کے درجنوں کارکن لندن کے گورڈن سکوائر پر جمع ہوئے، نعرے لگائے ، مزاحمتی نظمیں پڑھیں اور گیت گائے۔

(جاری ہے)

مقررین نے کہاکہ بھارتی شہری ہونے کے باوجود بنگالی مسلمانوں کو حراست، تشدد، گھروں کی مسماری اور یہاں تک کہ بنگلہ دیش جلاوطنی کا سامنا ہے۔ بنگالیوں کو محض مسلمان ہونے کی وجہ سے نشانہ بنایا جا رہا ہے۔مظاہرین نے نہ صرف بھارتی مسلمانوں، دلتوں اور عیسائیوں کے ساتھ بلکہ اسرائیلی درندگی کا شکار غزہ کے لوگوں کے ساتھ بھی یکجہتی کا اظہار کیا۔ انہوں نے ہندوتوا پر مبنی پالیسیوں، بشمول اقلیتوں پر حملوں، بلڈوزر کارروائی، جموں و کشمیر میں دفعہ 370 کی منسوخی اور جبر و استبداد کی دیگر کارروائی کی مذمت کی۔