آرڈی اے نے نجی ہاؤسنگ سکیم میں پلاٹوں اور فائلوں کی خرید و فروخت پر پابندی عائد کر دی

ہفتہ 16 اگست 2025 20:00

راولپنڈی (اُردو پوائنٹ اخبارتازہ ترین - اے پی پی۔ 16 اگست2025ء) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ نے نجی ہاؤسنگ سکیم کا دورہ کرکے غیر مجاز اور نامکمل ترقیاتی کاموں کے باعث فوری طور پر اس سکیم میں پلاٹوں اور فائلوں کی خرید و فروخت پر پابندی عائد کر دی۔ ڈی جی آر ڈی اے نے سڑکوں کی خراب حالت، تجاوزات، داخلی دروازے کی ٹوٹ پھوٹ، عزیز خان روڈ کی زبوں حالی اور دیگر پر شدید تشویش کا اظہار کیا۔

دورے کے دوران منعقدہ اجلاس میں رہائشیوں اور شکایت کنندگان نے متعدد شہری مسائل کی نشاندہی کی، جن میں سانپوں اور مچھروں کی بہتات، پانی کی قلت، غیر ہموار گلیاں، بجلی کی کم وولٹیج، کھلے مین ہولز، غیر محفوظ وائرنگ، لمبی گھاس سے ڈینگی کا خطرہ، اور ناقص سیوریج نظام شامل تھے۔

(جاری ہے)

ڈی جی آر ڈی اے کنزہ مرتضیٰ نے رہائشیوں اور الاٹیوں کو یقین دلایا کہ آر ڈی اے ان تمام مسائل کے حل کے لیے مکمل طور پر پرعزم ہے۔

انہوں نے ہدایت کی کہ فوری طور پر مساجد، پارکس، کھیل کے میدانوں اور سکولز کے لیے مختص اراضی کو ڈویلپر سے واگزار کرایا جائے اورلے آئوٹ پلان کو تجاوزات سے پاک کیا جائے۔ انہوں نے واضح کیا کہ سکیم کے سپانسر ز کو کوئی نیا یا ترمیم شدہ نقشہ جاری نہیں کیا جائے گا۔ ساتھ ہی قانونی کارروائی، بشمول گرفتاری اور نااہلی، پر غور کیا جا رہا ہے۔ آر ڈی اے شہریوں کے حقوق کے تحفظ اور تمام ہاؤسنگ سکیمز کو قانونی دائرہ کار کے تحت چلانے کے عزم کا اعادہ کرتا ہے۔