بابر اور رضوان اب اہم کھلاڑی نہیں رہے‘محمد حفیظ

اہم کھلاڑی وہ ہیں جو میچ جیتتے ہیں اور حالیہ برسوں میں رضوان اور بابر دونوں میچ جیتنے والی کارکردگی پیش کرنے میں ناکام رہے‘انٹرویو

اتوار 17 اگست 2025 12:30

لاہور(اُردو پوائنٹ اخبارتازہ ترین - این این آئی۔ 17 اگست2025ء)پاکستان ٹیم کے سابق کپتان محمد حفیظ کا کہنا ہے کہ بابر اعظم اور محمد رضوان اب اہم کھلاڑی نہیں رہے۔مقامی یوٹیوب چینل سے گفتگو کرتے ہوئے محمد حفیظ نے کہا کہ اہم کھلاڑی وہ ہیں جو میچ جیتتے ہیں اور حالیہ برسوں میں رضوان اور بابر دونوں میچ جیتنے والی کارکردگی پیش کرنے میں ناکام رہے ہیں، سلمان علی آغا ٹیم کے لیے زیادہ مستحق اور اہم کھلاڑی ہیں۔

انہوں نے کہا کہ اگر ہم گزشتہ ڈیڑھ سے دو سال پر نظر ڈالیں تو مسلسل کارکردگی دکھانے والے کھلاڑی سلمان علی آغا، صائم ایوب اور حسن نواز ہیں، ہم ان کے بارے میں بات کیوں نہیں کر رہے، یہ پاکستان کے لیے میچ جیتنے والے موجودہ کھلاڑی ہیں۔حفیظ نے ٹیم میں بابر اور رضوان کی جگہ پر بھی سوال اٹھاتے ہوئے کہا کہ انہیں بطور کھلاڑی اپنی جگہوں کو درست ثابت کرنے کی ضرورت ہے۔

(جاری ہے)

انہوں نے کہا کہ میرے خیال میں بابر اور رضوان کو ٹیم میں اپنی پوزیشن کے بارے میں فکر مند ہونے کی ضرورت ہے، انہیں پہلے خود کو اچھے کھلاڑی ثابت کرنے کی ضرورت ہے، اہم کھلاڑی بعد میں آتے ہیں۔ دونوں ماضی میں اچھے تھے، لیکن اب وہ نتائج نہیں دے رہے۔سابق کپتان نے دونوں کو دوبارہ فارم میں آنے کا مشورہ دیا اور نسیم شاہ اور شاہین شاہ آفریدی کی پرفارمنس پر بھی تنقید کی۔

ان کا مزید کہنا تھا کہ دونوں کو کھیل میں پوری طرح شامل ہونے کی ضرورت ہے، ورنہ نتائج نہیں آئیں گے۔ یہی مسئلہ نسیم شاہ اور شاہین شاہ آفریدی کا ہے، وہ بھی پاکستان کے لیے میچ وننگ پرفارمنس نہیں دے رہے ہیں۔حفیظ نے زور دے کر کہا کہ پاکستان کرکٹ کو بڑے ناموں کی ضرورت نہیں بلکہ ایسے کھلاڑیوں کی ضرورت ہے جو اگلی دہائی تک مسلسل کارکردگی دکھا سکیں۔