راولپنڈی میں شدید بارشوں کے امکان کے پیش نظر واسا، ریسکیو 1122 سمیت تمام متعلقہ ادارے ہائی الرٹ

اتوار 17 اگست 2025 17:50

راولپنڈی (اُردو پوائنٹ اخبارتازہ ترین - اے پی پی۔ 17 اگست2025ء) جڑواں شہروں میں مون سون بارشوں کے ساتویں سپیل کا آغاز ہو گیا۔ اتوار کو جڑواں شہروں میں مجموعی طور پر 80 ملی میٹر سے زائد بارش ریکارڈ کی گئی۔ نالہ لئی میں کٹاریاں کے مقام پر 14 فٹ جبکہ گوالمنڈی پل پر پانی کا بہاؤ 10 فٹ ریکارڈ کیا گیا۔محکمہ موسمیات نے مزید بارشوں کی پیشن گوئی کی ہے۔

راولپنڈی میں شدید بارشوں کے امکان کے پیش نظر واسا، ریسکیو 1122 سمیت تمام متعلقہ ادارے ہائی الرٹ ہیں۔محکمہ موسمیات کے مطابق سید پور کے مقام پر 69 ملی میٹر، گولڑ ہ 71 ملی میٹر، بوکڑہ 29 ملی میٹر، پی ایم ڈی 37 ملی میٹر شمس آباد 34 ملی میٹر، کچہری 22 ملی میٹر، پیر ودھائی 27 ،گوالمنڈی 30 جبکہ کٹاریاں کے مقام پر 31 ملی میٹر بارش ریکارڈ کی گئی۔

(جاری ہے)

صوبائی وزیر برائے ہاؤسنگ پنجاب بلال یاسین نے کہا ہے کہ شدید بارشوں کے پیش نظر رین ایمرجنسی نافذ کی گئی ہے اور تمام ادارے ہائی الرٹ ہیں۔

شہریوں کے جان ومال کی حفاظت اولین ترجیح ہے۔ اس ضمن میں تمام وسائل بروئے کار لائے جا رہے ہیں۔ موسمی صورتحال کے پیش نظر واسا راولپنڈی ہائی الرٹ، عملہ و ہیوی مشینری نشیبی علاقوں میں تعینات ہے۔ ایم ڈی واسا راولپنڈی محمد سلیم اشرف نے کہا ہے کہ وزیر برائے ہاؤسنگ پنجاب بلال یاسین کی ہدایت پر واسا راولپنڈی کا عملہ و ہیوی مشینری نشیبی علاقوں میں تعینات ہے۔

نکاسی آب آپریشن کی خود نگرانی کر رہا ہوں۔ نالہ لئی اور شہر بھر کے نالوں کی مسلسل مانیٹرنگ کی جارہی ہے۔ محکمہ موسمیات کی جانب سے اگلے دو دن شدید بارشوں کی پیش گوئی کی گئی ہے۔شہریوں سے اپیل ہے کہ غیر ضروری گھروں سے باہر نہ نکلیں۔ ندی نالوں اور بجلی کے کھمبوں سے دور رہیں۔کسی بھی قسم کی ایمرجنسی صورتحال سے نپٹنے کیلئے تیار ہیں۔