حکومت ملک میں ٹین پن باؤلنگ کے کھیل کے فروغ کے لئے اقدامات کرے،اعزاز اعجاز

اتوار 17 اگست 2025 20:40

اسلام آباد (اُردو پوائنٹ اخبارتازہ ترین - این این آئی۔ 17 اگست2025ء)ٹین پن باؤلنگ کے قومی کھلاڑی اعزاز اعجاز نے کہا ہے کہ حکومت ملک میں ٹین پن باؤلنگ کے کھیل کے فروغ کے لئے اقدامات کرے۔ ان خیالات کا اظہار انہوں نے گزشتہ روز میڈیا سے گفتگو کرتے ہوئے کیا۔ انہوں نے کہا کہ وفاقی دارالحکومت سمیت ملک بھر میں ٹین پن باؤلنگ کے ٹیلنٹ کی کمی نہیں بلکہ کھلاڑیوں کو وسائل اور سہولیات فراہم کرنے کی ضرورت ہے۔

انہوں نے گزشتہ روز اسلام آباد میں کھیلی گئی آزادی کپ ٹین پن باؤلنگ چیمپئن شپ کے ڈبلز کا ٹائٹل اسلام آباد کی ٹیم کے جیتنے پر خوشی اور مسرت کا اظہار کیا جس ٹیم کا وہ بھی حصہ تھے۔ چیمپئن شپ میں ملک بھر سے مرد اور خواتین کھلاڑیوں نے حصہ لیا۔ جس میں بہت سا نیا ٹیلنٹ بھی شامل تھا۔

(جاری ہے)

ایک سوال کے جواب میں اعزاز اعجاز نے کہا کہ صوبائی سطح پر سپورٹس بورڈ موجود جو کھلاڑیوں کو وسائل، سہولیات اور فلاح و بہبود کے لئے کام کرتے ہیں لیکن وفاقی دارالحکومت اسلام آباد کوئی سپورٹس بورڈ کے نام کی چیز نہیں جس سے ہم کوئی مدد لیں سکیں۔

انہوں نے کہا کہ ہم اپنی مدد آپ کے تحت ملک کے دوسرے شہروں میں ایونٹ میں شرکت کرتے ہیں اس کے علاوہ یا پھر پاکستان ٹین پن باؤلنگ فیڈریشن ہماری تھوری بہت معاونت کردیتی ہے۔ انہوں نے کہا کہ ہماری حکومت سے درخواست ہے کہ وفاقی دارالحکومت اسلام آباد میں سپورٹس بورڈ کو فعال کیا جائے تاکہ اسلام آباد کے کھلاڑیوں کو بھی وسائل اور سہولیات میسر ہوں سکیں۔