بابر اعظم اور رضوان کا چیپٹر کلوز ہو گیا؟، کرکٹ حلقوں میں بحث شروع

مائیک ہیسن نے جب ٹیم کا چارج سنبھالا تھا تو پہلے ہی کہہ دیا تھا کہ وہ پرانی ساکھ پر نہیں بلکہ پرفارمنس اور حالیہ فارم پر سلیکشن کریں گے

ذیشان مہتاب منگل 19 اگست 2025 12:21

بابر اعظم اور رضوان کا چیپٹر کلوز ہو گیا؟، کرکٹ حلقوں میں بحث شروع

لاہور (اردو پوائنٹ تازہ ترین اخبار ۔ 19 اگست 2025ء ) ایشیا کپ اسکواڈ سے سابق کپتان بابر اعظم اور رضوان کو باہر کیے جانے پر یہ سوال اٹھ رہا ہے کہ کیا دونوں کھلاڑیوں کا چیپٹر کلوز ہو گیا اور اس معاملے پر ملک بھر کے کرکٹ حلقوں میں بحث شروع ہوگئی ہے۔

آئندہ ماہ یو اے ای میں کھیلے جانے والے ایشیا کپ اور اس سے قبل سہ ملکی ٹی ٹوئنٹی سیریز کے لیے گزشتہ روز پاکستان کے 17 رکنی اسکواڈ کا اعلان کیا گیا۔

شائقین کرکٹ یہ جان کر حیران رہ گئے کہ ورلڈ کپ کے لیے تجربہ کار کھلاڑی بابر اعظم اور محمد رضوان کو شامل نہیں کیا گیا تھا۔

اس سے قبل دورہ بنگلہ دیش اور ویسٹ انڈیز میں بھی ٹی 20 سیریز کے لیے دونوں کھلاڑیوں کو نظر انداز کر دیا گیا تھا۔ تاہم ورلڈ کپ اسکواڈ سے نظر انداز کیے جانے کے بعد اب کرکٹ شائقین میں یہ سوال اٹھایا جا رہا ہے کہ کیا دونوں تجربہ کار بلے بازوں کو ٹی 20 میں چیپٹر کلوز ہو چکا ہے۔

(جاری ہے)

اس حوالے سے سینئر صحافی شاہد ہاشمی نے بتایا کہ قومی ٹیم کے ہیڈ کوچ مائیک ہیسن نے جب ٹیم کا چارج سنبھالا تھا تو پہلے ہی کہہ دیا تھا کہ وہ پرانی ساکھ پر نہیں بلکہ پرفارمنس اور حالیہ فارم پر سلیکشن کریں گے۔

انہوں نے کہا کہ ہیڈ کوچ سمجھتے ہیں کہ اس وقت نوجوان کھلاڑی ٹی 20 میں اچھی پرفارمنس دکھا رہے ہیں۔ اس لیے ٹی 20 ٹیم میں بابر اعظم اور محمد رضوان کی جگہ نہیں بنتی اور میرا خیال ہے کہ یہ دونوں کھلاڑی ان کی ٹی 20 ورلڈ کپ 2026ء کی پلاننگ کا بھی حصہ نہیں ہیں تاہم مائیک ہیسن نے بابر اعظم کو ٹیم میں واپسی کے لیے اپنا اسٹرائیک ریٹ تیز کرنے اور اسپن بولنگ کے سامنے بیٹنگ بہتر بنانے کا ٹاسک دیا ہے۔

سینئر سپورٹس رپورٹر نے کہا کہ پاکستان ٹیم نے 2022ء میں فائنل ٹی 20 کھیلا۔ اس کے بعد سے ٹیم کی کارکردگی مسلسل زوال کا شکار رہی۔ تب سے اب تک گرین شرٹس نے 52 میچ کھیلے۔ اس میں سے صرف 20 جیتے اور 30 میں شکستوں کا سامنا کرنا پڑا۔

انہوں نے ایشیا کپ اور ٹرائی نیشن سیریز کو آئندہ سال ہونے والے ٹی ٹوئنٹی ورلڈ کپ کی تیاریوں کا حصہ قرار دیتے ہوئے کہا کہ اس سے اچھی ٹیم نہیں بن سکتی تھی۔

اس اسکواڈ میں فاسٹ بولنگ اٹیک اور اسپن بولرز کی جوڑی بہترین ہے جب کہ ٹاپ آرڈر اور مڈل آرڈر میں بھی نوجوان کھلاڑی اچھی پرفارمنس دکھا رہے ہیں۔