بھارتی فٹبال ٹیم بھی پاکستان کا مقابلہ کرنے کی بجائے فرار ہوگئی

بھارتی ٹیم کے منتظر رہے کہ وہ آئیں تو میچ کھیلیں، لیکن انڈین ٹیم ہمارے مقابلے پر آنے کے بجائے وہاں سے فرار ہو گئی : ہیڈ کوچ عبدالرشید

ذیشان مہتاب منگل 19 اگست 2025 12:35

بھارتی فٹبال ٹیم بھی پاکستان کا مقابلہ کرنے کی بجائے فرار ہوگئی

اوسلو (اردو پوائنٹ تازہ ترین اخبار ۔ 19 اگست 2025ء) کھیل کا میدان اور مدمقابل پاکستان اور بھارت تو مزا ہی الگ ہے لیکن اس بار بھارتی ٹیم پاکستان کا مقابلہ کرنے کے بجائے فرار ہو گئی۔

پاکستان اور بھارت دو روایتی حریف ممالک ہیں۔ یہ کسی بھی کھیل کے میدان میں مدمقابل ہوں تو شائقین کا جوش وخروش بڑھ جاتا ہے تاہم اس بار انڈین ٹیم پاکستان کے مقابلے پر نہیں آئی اور میچ کھیلنے کے بجائے فرار ہونے میں عافیت جانی۔

یہ واقعہ حال میں ناروے کے دارالحکومت اوسلو میں کھیلے جانے والے دنیا کے سب سے بڑے یوتھ فٹبال ٹورنامنٹ ناروے کپ 2025ء میں رونما ہوا۔

لیاری سے تعلق رکھنے والے انڈر 15 بوائز نے یہ ٹورنامنٹ جیت کر پہلی بار یورپ میں گولڈ میڈل جیتا اور سنہری ٹرافی وطن لے کر آئے۔

(جاری ہے)

ہیڈ کوچ عبدالرشید نے یہ انکشاف کیا اور بتایا کہ بھارت اور ہم الگ الگ لیول کے ٹورنامنٹ کھیل رہے تھے۔

تاہم ان کے ہیڈ کوچ نے ہمارے ساتھ دوستانہ میچ کھیلنے کی درخواست کی اور ہم نے رضامندی ظاہر کر دی۔

تاہم جب ہم فائنل جیت گئے تو جشن منانے کے بعد بھارتی ٹیم کے منتظر رہے کہ وہ آئیں تو میچ کھیلیں، لیکن انڈین ٹیم ہمارے مقابلے پر آنے کے بجائے وہاں سے فرار ہو گئی اور اس کے بعد انہیں نہیں دیکھا۔

ہیڈ کوچ نے شکوہ کیا کہ بھارتی ٹیم سیون اے سائیڈ ٹورنامنٹ جیتی تو ان کے وزیراعظم نے پوری ٹیم کو بلایا جب کہ ہمارے بچے تو مکمل 11 کھلاڑیوں کی ٹیم کا میچ کھیلے اور جذبہ وجنون کے ساتھ ٹورنامنٹ جیتا لیکن ان بچوں کو وہ پذیرائی نہیں ملی۔

کچھ نہیں تو ایک بار وزیراعظم شہباز شریف ان بچوں کو بلا کر ان کے ساتھ چائے ہی پی لیں تاکہ ان کی حوصلہ افزائی ہو۔

ان کا کہنا تھا کہ یہ تاریخ میں پہلا موقع ہے کہ پاکستان یورپ سے گولڈ میڈلز جیت کر آئے اور ٹرافی بھی وطن لائے۔