ایف بی آر نے ٹیکس فراڈ ،چوری کی روک تھام کے لیے تحقیقات کا دائرہ کار وسیع کردیا

پیر 18 اگست 2025 16:54

لاہور (اُردو پوائنٹ اخبارتازہ ترین - این این آئی۔ 18 اگست2025ء) فیڈرل بورڈ آف ریونیو (ایف بی آر)نے ٹیکس فراڈ اور چوری کی روک تھام کے لیے تحقیقات کا دائرہ کار وسیع کرتے ہوئے اضافی سہولیات حاصل کر لی ہیں۔ ذرائع کے مطابق اب ایف بی آر صارفین کے انٹرنیٹ اور ٹیلی کام ڈیٹا تک رسائی حاصل کر سکے گا۔

(جاری ہے)

ذرائع کا کہنا ہے کہ پاکستان ٹیلی کمیونیکیشن اتھارٹی (پی ٹی ای)بھی ایف بی آر کو مطلوبہ ڈیٹا فراہم کرے گا، جس کے تحت تمام انٹرنیٹ سروس فراہم کرنے والی کمپنیوں سے سبسکرائبرز کا مکمل ڈیٹا حاصل کیا جا سکے گا۔

ایف بی آر نے اس عمل کے لیے باقاعدہ آڈیٹرز کی تقرری کا بھی فیصلہ کیا ہے، جو ٹیکس فراڈ کی تحقیقات میں اہم کردار ادا کریں گے۔ ذرائع کے مطابق آڈیٹرز رجسٹرڈ افراد کے ڈیٹا کی رازداری قانون کے مطابق یقینی بنائیں گے۔اس کے ساتھ ساتھ ایف بی آر ٹیکس معاملات اور ویلیوایشن کے شعبے میں ماہرین کی خدمات بھی حاصل کرے گا تاکہ تحقیقات کے معیار کو بہتر بنایا جا سکے۔ حکام کا کہنا ہے کہ جدید ٹیکنالوجی اور ماہرین کی مدد سے اب ٹیکس چوری اور بے قاعدگیوں کا سراغ لگانا مزید موثر ہوگا۔