خیبرپختونخواہ حکومت کا سیلاب متاثرین کیلئے امداد میں 100 فیصد اضافہ

سیلاب سے متاثرہ ہر شخص کو صوبائی حکومت گھر بنا کر دے گی، سیلاب متاثرین کو نقصانات کے معاوضوں کی آن لائن ادائیگی کیلئے خصوصی ایپ کا اجراء کر دیا گیا

محمد علی پیر 18 اگست 2025 20:55

پشاور(اُردو پوائنٹ اخبارتازہ ترین۔ 18 اگست2025ء) خیبرپختونخواہ حکومت کا سیلاب متاثرین کیلئے امداد میں 100 فیصد اضافہ، سیلاب سے متاثرہ ہر شخص کو صوبائی حکومت گھر بنا کر دے گی، سیلاب متاثرین کو نقصانات کے معاوضوں کی آن لائن ادائیگی کیلئے خصوصی ایپ کا اجراء کر دیا گیا۔ تفصیلات کے مطابق خیبرپختونخواہ حکومت نے صوبے میں ایمرجنسی کی صورتحال کے پیش نظر سیلاب متاثرین کو نقصانات کے معاوضوں کی آن لائن ادائیگی کیلئے خصوصی ایپ کا اجراء کر دیا ہے۔

وزیر اعلیٰ علی امین خان گنڈاپور نے پیر کے روز ڈیجیٹل پیمنٹ سسٹم کا باضابطہ اجراء کردیا۔"ڈیجیٹل ڈیزاسٹر کمپنسیشن مینجمنٹ" کے نام سے یہ جدید ایپ خیبر پختونخواہ آئی ٹی بورڈ کی طرف سے ہنگامی طور پر تیار کی گئی ہے۔ اس سسٹم کو صوبائی حکومت کے مرکزی سروس ڈیلیوری ایپ "دستک" کے ساتھ منسلک کردیا گیا ہے۔

(جاری ہے)

ایپ کے ذریعے سیلاب متاثرین کو ان کے تباہ شدہ املاک کے معاوضے براہ راست اور آن لائن ادا کئے جائیں گے۔

اس آن لائن سسٹم کے ذریعے متاثرین اپنے املاک کے نقصانات کی تفصیلات خود بھی اپ لوڈ کر کے معاوضہ کلیم کر سکیں گے۔یہ ایپ مکمل شفاف اور خود کار میکنزم پر مشتمل ہے جس سے متاثرین کو بروقت اور شفاف طریقے سے معاوضے کی فراہمی ممکن ہو گی۔ جیو ٹیگنگ کی سہولت کی وجہ سے غلط معلومات کی فراہمی یا کلیم ممکن نہیں ہو گا۔ مزید برآں اس ایپ کے ذریعے نقصانات اور معاوضوں کی ویری فکیشن بھی خودکار طریقے سے کی جائے گی۔

یہ ایک مکمل طور پر پیپر لیس اور کیش لیس سسٹم ہے جس کے تحت معاوضوں کی آن لائن ادائیگی کی جائے گی۔ وزیر اعلیٰ اور چیف سیکرٹری کے علاوہ دیگر متعلقہ حکام کیلئے ڈیش بورڈ پر نقصانات اور معاوضوں کی ادائیگی کی مکمل تفصیلات دستیاب ہوں گی۔ وزیر اعلیٰ نے سیلاب زدگان کو معاوضوں کی براہ راست ادائیگی کیلئے ڈیجیٹل پیمنٹ سسٹم کے اجراء کو ایک اہم اقدام قرار دیا اور مختصر وقت میں یہ ایپ تیار کرنے پر متعلقہ حکام کو خراج تحسین پیش کیا۔

انہوں نے کہا کہ اس اقدام سے نہ صرف متاثرین کو معاوضوں کی بروقت ادائیگی ممکن ہوگی بلکہ اس پورے عمل میں شفافیت بھی یقینی ہوگی۔ وزیر اعلیٰ کا کہنا تھا کہ متاثرین کو بروقت ریلیف اور سہولیات کی فراہمی صوبائی حکومت کی پہلی ترجیح ہے اور یہ ایپ اس سلسلے میں خصوصی اہمیت کی حامل ہے۔