وزیر اعلیٰ کے معاون خصوصی کا سیلاب متاثرین کی امداد کے لیے صوابی اور سوات کا دورہ،انتظامیہ کو الرٹ رہنے کی ہدایت

پشاور (اُردو پوائنٹ اخبارتازہ ترین - اے پی پی۔ 20 اگست2025ء) وزیر اعلیٰ خیبر پختونخوا کے معاون خصوصی برائے ریلیف، بحالی و آباد کاری ملک نیک محمد خان داوڑ نے سیلاب متاثرین کی امداد کے سلسلے میں ضلع صوابی کا دورہ کیا۔تر جمان محکمہ ریلیف کے پی کے کے مطابق معاون خصوصی نے ڈپٹی کمشنر آفس میں ضلعی انتظامیہ کے ساتھ اجلاس میں شرکت کی اور حالیہ بارشوں اور سیلابی صورتحال کے حوالے سے تفصیلی بریفنگ لی۔

انہوں نے ریسکیو 1122، پی ڈی ایم اے اور سول ڈیفنس کی ٹیموں کو مزید الرٹ رہنے کی ہدایت کی تاکہ کسی بھی ہنگامی صورتحال سے بروقت نمٹا جا سکے۔ ملک نیک محمد خان داوڑ نے متعلقہ اداروں کو سیلاب متاثرین کی فوری امداد اور ریسکیو آپریشن کو مزید موثر بنانے کےلئے درکار آلات اور سامان کی فراہمی کی ہدایت بھی کی۔

(جاری ہے)

انہوں نے کہا کہ متاثرہ عوام کو ہر ممکن ریلیف فراہم کرنا حکومت کی اولین ترجیح ہے اور کسی قسم کی کوتاہی برداشت نہیں کی جائے گی۔

بعد ازاں انہوں نے سوات کا بھی دورہ کیا۔ اس موقع پر انہیں کلاؤڈ برسٹ اور حالیہ بارشوں سے پیدا ہونے والی سیلابی صورتحال بارے تفصیلی بریفنگ دی گئی۔ملک نیک محمد خان داوڑ نے ریسکیو 1122 ہیڈکوارٹر مینگورہ اور ضلعی دفتر کا بھی دورہ کیا جہاں ڈسٹرکٹ ایمرجنسی آفیسر رفیع اللہ مروت نے ریسکیو سرگرمیوں، متاثرین کو فراہم کی جانے والی طبی امداد اور ریلیف آپریشنز کے بارے میں انہیں آگاہ کیا۔

انہیں بتایا گیا کہ ریسکیو اہلکاروں نے مشکل ترین حالات میں سینکڑوں انسانی جانیں بچائیں اور متاثرہ عوام کو بروقت امداد فراہم کی۔معاون خصوصی نے ریسکیو اہلکاروں کی پیشہ ورانہ صلاحیتوں، جدید ٹیکنالوجی کے استعمال اور ایمرجنسی کال ہینڈلنگ سسٹم پر اطمینان کا اظہار کرتے ہوئے انہیں بہترین کارکردگی پر شاباش دی۔ انہوں نے ایمبولینس، فائر وہیکلز اور واٹر ریسکیو گاڑیوں کا بھی معائنہ کیا اور ریسکیو 1122 سوات کی کارکردگی کو خراج تحسین پیش کیا۔

ملک نیک محمد خان داوڑ نے کہا کہ ریسکیو اہلکار عوام کی جان و مال کے اصل محافظ ہیں۔ انہوں نے یقین دہانی کرائی کہ ریسکیو 1122 کو مزید فعال اور مضبوط بنانے کے لیے حکومت تمام ممکن اقدامات کرے گی تاکہ عوام کو بروقت اور معیاری خدمات فراہم کی جا سکیں۔