یوکرین میں امریکی فوج نہیں بھیجیں گے،ٹرمپ کا اعلان

فرانس، جرمنی اور برطانیہ زمینی افواج تعینات کرنے کے لیے تیار ہیں،بیان

بدھ 20 اگست 2025 15:59

واشنگٹن(اُردو پوائنٹ اخبارتازہ ترین - این این آئی۔ 20 اگست2025ء)امریکی صدر ڈونلڈ ٹرمپ نے واضح کیا ہے کہ یوکرین میں کسی بھی ممکنہ امن معاہدے کی صورت میں امریکا اپنی فوج نہیں بھیجے گا تاہم فضائی مدد فراہم کی جا سکتی ہے۔ٹرمپ کا یہ بیان اس وقت سامنے آیا جب انہوں نے یوکرین کے صدر ولادیمیر زیلنسکی اور یورپی رہنمائوں کو وائٹ ہائوس میں مدعو کیا، یہ ملاقات تین روز قبل ولادیمر پوٹن سے ان کی تاریخی ملاقات کے بعد ہوئی۔

(جاری ہے)

ٹرمپ نے دعوی کیا کہ پیوٹن نے زیلنسکی سے ملاقات پر رضامندی ظاہر کی ہے اور کچھ مغربی سکیورٹی ضمانتوں کو قبول کیا ہے تاہم کیف اور مغربی دارالحکومتوں نے ان دعوں پر احتیاط کا اظہار کیا ہے۔ٹرمپ نے کہا کہ یورپی ممالک جیسے فرانس، جرمنی اور برطانیہ زمینی افواج تعینات کرنے کے لیے تیار ہیں تاہم امریکا صرف فضائی مدد فراہم کرے گا، آپ کو میری یقین دہانی ہے کہ امریکی فوج زمین پر نہیں ہوگی اور میں صدر ہوں۔