آئی جی پنجاب کی زیر صدارت صوبہ بھر کے ریڈرز کا اجلاس

سی سی پی او لاہور سمیت پنجاب بھر کے آر پی اوز، سی پی اوز، ڈی پی اوز کے ریڈرز کی شرکت

جمعرات 21 اگست 2025 19:30

لاہور (اُردو پوائنٹ اخبارتازہ ترین - این این آئی۔ 21 اگست2025ء) انسپکٹر جنرل پولیس پنجاب ڈاکٹر عثمان انور کی زیر صدارت لاہور سمیت صوبہ بھر کے ریڈرز کی مجموعی کارکردگی بارے جائزہ اجلاس سنٹرل پولیس آفس میں منعقد ہوا۔ سی سی پی او لاہور سمیت پنجاب بھر کے آر پی اوز، سی پی اوز اور ڈی پی اوز کے ریڈرز نے شرکت کی۔ آئی جی پنجاب نے ریڈرز کو پیپر لیس ورکنگ اور کرائم ڈیٹا باقاعدگی سے اپ ڈیٹ کرنے کا حکم دیتے ہوئے کہا کہ انٹیگریٹڈ کریمینل جسٹس سسٹم کے تحت انصاف کی فراہمی کے لئے پولیس ریکارڈ کا اپ ڈیٹ ہونا انتہائی اہم ہے۔

ڈی پی اوز اپنے اور ایس ڈی پی اوز کے ریڈرز و متعلقہ دفاتر میں ریکارڈ چیکنگ کے بعد سرٹیفیکیٹس دیں گے۔آئی جی پنجاب نے کہا کہ تمام دفاتر میں ریکارڈ درست اور محفوظ ہونے کا خود بھی اچانک جائزہ لوں گا۔

(جاری ہے)

کرائم ٹرینڈ کی درست نشاندہی اور جرائم کی بروقت سرکوبی کے لئے ریڈرز کا ایماندار ہونا لازمی امر ہے۔کرائم کی درست نشاندہی پر ہی سینئر افسران فوری ایکشن اور دفتری امور بطریق احسن انجام دے سکتے ہیں۔

کرائم ڈائری و ٹرینڈز، اشتہاری مجرمان کی گرفتاری کا تمام ریکارڈ مستند اور کمپیوٹرائزڈ ہونا چاہئے۔متروکہ ردی، بیکار کاغذات تلف کرکے انتہائی ضروری ریکارڈ ہی درست حالت میں رکھا جائے۔ریڈرز و دیگر عملہ دفتری امور ، خط و کتابت میں آرٹیفیشل انٹیلیجنس اور، جدید ٹیکنالوجی سے استفادہ حاصل کریں۔ ایف آئی آرز کا فوری اندراج اور 1787 پر موصولہ شکایات کا فوری ازالہ یقینی بنایا جائے۔ایڈیشنل آئی جی پنجاب سلطان احمد چوہدری، ڈی آئی جی اسٹیبلشمنٹ ون سلیمان سلطان رانا، ڈی آئی جی اسٹیبلشمنٹ ٹو کیپٹن (ر) لیاقت علی ملک، اے آئی جی ایڈمن اسد اعجاز ملہی اور اے آئی جی انسپکشن شائستہ ندیم سمیت دیگر افسران موجود تھے۔