اپوزیشن لیڈر کی نااہلی کے بعد الیکشن کمیشن میں اہم تعیناتیاں التواء کا شکار

وزیراعظم اور اپوزیشن لیڈر کی مشاورت کے بغیر تقرری ممکن نہیں،ذرائع

جمعرات 21 اگست 2025 19:50

اسلام آباد (اُردو پوائنٹ اخبارتازہ ترین - این این آئی۔ 21 اگست2025ء)قومی اسمبلی میں اپوزیشن لیڈر عمر ایوب کی نااہلی کے بعد الیکشن کمیشن میں اہم تعیناتیوں کا معاملہ مزید الجھ گیا، نئے اپوزیشن لیڈر کی تعیناتی تک چیف الیکشن کمشنر اور دو ارکان کی تقرری ممکن نہیں۔ذرائع کے مطابق اپوزیشن لیڈر کی تقرری کے خلاف خود تحریک انصاف نے حکم امتناع لے رکھا ہے۔

(جاری ہے)

چیف الیکشن کمشنر اور دو ارکان کی تعیناتی کیلئے آئینی طور پر وزیراعظم اور اپوزیشن لیڈر میں مشاورت لازمی ہے، مشاورت کے بعد نام پارلیمانی کمیٹی کو بھیجے جائیں گے جو حتمی فیصلہ کرے گی۔ذرائع کے مطابق وزیراعظم کے خط کو تین ماہ گزرنے کے باوجود سابق اپوزیشن لیڈر عمر ایوب نے جواب نہیں دیا تھا۔ انہوں نے براہِ راست سپیکر قومی اسمبلی کو کمیٹی بنانے کا مراسلہ بھجوا دیا تھا جس پر سپیکر نے وزیراعظم سے مشاورت کا کہہ دیا، اسی تعطل کے باعث چیف الیکشن کمشنر اور دو ارکان کی 5سالہ آئینی مدت 25جنوری کو مکمل ہونے کے باوجود نئی تقرریاں عمل میں نہیں آ سکیں۔ چھبیسویں آئینی ترمیم کے تحت موجودہ چیف الیکشن کمشنر اور ارکان نئی تعیناتیوں تک کام جاری رکھے ہوئے ہیں۔