بھارت میں اقلیتوں خصوصا مسلمانوں پر وحشیانہ مظالم کا سلسلہ جاری ہے،رپورٹ

جمعہ 22 اگست 2025 11:44

اسلام آباد (اُردو پوائنٹ اخبارتازہ ترین - اے پی پی۔ 22 اگست2025ء) آج دنیا بھر میں مذہب یا عقیدے کی بنیاد پر ظلم و تشدد کا نشانہ بننے والوں کو خراج عقیدت پیش کرنے کا عالمی دن منایاجارہا ہے ،تاہم بھارت میں اقلیتوں خصوصا مسلمانوں پر وحشیانہ مظالم کاسلسلہ جاری ہے ۔کشمیر میڈیا سروس کے ریسرچ سیکشن کی طرف سے اس دن کے حوالے سے جاری کی گئی ایک رپورٹ میں کہا گیا ہے کہ مودی حکومت ملک بھرمیں ہندوتوا آر ایس ایس کے اقلیت مخالف ایجنڈے پر عمل پیرا ہے۔

بھارتیہ جنتا پارٹی کے دور حکومت میں مسلمانوں، مسیحیوں اور دیگر مذہبی اقلیتوں کے خلاف نفرت انگیز جرائم میں تیزی سے اضافہ ہوا ہے۔ بھارت میں مذہبی اقلیتیں مسلسل خوف اور عدم تحفظ کے ماحول میں زندگی گزارنے پر مجبور ہیں ۔

(جاری ہے)

رپورٹ میں کہا گیا ہے کہ مودی کے بھارت میں اقلیتوں کو خاموش کرانے کے لیے دہشتگردی کو ریاستی پالیسی کے طورپر استعمال کیاجارہاہے اور بھارت کو اقلیتوں سے پاک کر کے ایک ہندو راشٹر بنانا بی جے پی کا مشن ہے ۔

رپورٹ میں مزیدکہاگیاہے کہ مودی حکومت کھلے عام بھارت میں ہندو بالادستی کو فروغ دے رہی ہے اور ہندوتوا غنڈوں کی طرف سے اقلیتوں کے مذہبی مقامات کی بے حرمتی اور توڑ پھوڑ روز کا معمول بن گیاہے۔رپورٹ کے مطابق مودی حکومت بھارت میں اقلیتوں کے ساتھ دوسرے درجے کے شہریوں جیسا سلوک جاری رکھے ہوئے ہے ، عالمی برادری بھارت میں اقلیتوں پرڈھائے جانے والے مظالم کا فوری نوٹس لے۔