معروف شاعرہ ادا جعفری کا یوم پیدائش جمعہ 22 اگست کو منایا گیا

جمعہ 22 اگست 2025 14:00

اسلام آباد (اُردو پوائنٹ اخبارتازہ ترین - اے پی پی۔ 22 اگست2025ء) اردو زبان کی معروف شاعرہ ادا جعفری کا یوم پیدائش جمعہ 22 اگست کو منایا گیا ۔ وہ 22 اگست 1924ء کو بدایوں میں پیدا ہو ئیں اور ان کا خاندانی نام عزیز جہاں تھا۔ تین سال کی عمر میں ان کے والد بدرالحسن کے انتقال کے بعد ان کی پرورش ننھیال میں ہوئی۔ ادا جعفری نے 13 سال کی عمر میں ہی شاعری شروع کر دی ، وہ ادا بدایونی کے نام سے شعر کہتی تھیں۔

اس وقت ادبی رسالوں میں ان کا کلام شائع ہونا شروع ہو گیا ۔ان کی شادی 1947ء میں نور الحسن جعفری سے انجام پائی اور جس کے بعد وہ ادا جعفری کے نام سے لکھنے لگیں۔ ادا جعفری عموماً اختر شیرانی اور اثر لکھنوی سے اصلاح لیتی ر ہیں، ان کے شعری مجموعے شہر درد کو 1968ء میں آدم جی ادبی انعام سے نوازا گیا ۔

(جاری ہے)

انہوں نے شاعری کے بہت سے مجموعوں کے علاوہ 1995ء جو رہی سو بے خبری رہی کے نام سے اپنی خود نوشت سوانح عمری بھی تحریر کی۔

1991ء میں حکومت پاکستان نے ادبی خدمات کے اعتراف میں ادا جعفری کو تمغہ امتیاز سے نوازا۔ ادا جعفری 12 مارچ 2015 کو 90 سال کی عمر میں کراچی میں انتقال کر گئیں۔ ان کی سالگرہ کے موقع پر علمی و ادبی حلقوں کی جانب سے سے ان کی خدمات کے اعتراف میں انہیں بھر پور انداز میں خراج تحسین پیش کیا گیا۔\932