دریائے ستلج میں پانی کی سطح بلند ہونے پر سیلابی صورتحال ،قصور، بہاولنگر، عارف والا اور منچن آباد میں درجنوں دیہات متاثر

قصور میںہزاروں ایکڑ اراضی زیر آب ، نگر ایمن پورہ، مبوکی، بستی ابرہیم، ماہی والا، فتی والا سمیت 30 سے زائد دیہات کا زمینی راستہ منقطع بہاولنگر میں بونگہ احسان کے قریب نوجوان دریا میں گر کر ڈوب گیا، تلاش کے لیے ریسکیو آپریشن ،چھوٹے حفاظتی بند ٹوٹ گئے

ہفتہ 23 اگست 2025 12:15

لاہور/قصور/بہاولنگر(اُردو پوائنٹ اخبارتازہ ترین - این این آئی۔ 23 اگست2025ء)دریائے ستلج میں پانی کی سطح بلند ہونے پر سیلابی صورت حال پیدا ہو گئی جس سے قصور، بہاولنگر، عارف والا اور منچن آباد میں درجنوں دیہات متاثر ہو گئے ہیں جبکہ ایک نوجوان بھی دریا میں گر گیا۔قصور کے ہیڈ گنڈا سنگھ والا کے مقام پر پانی کی سطح 21.30 فٹ اور بہا ئوایک لاکھ 30 ہزار کیوسک ریکارڈ کیا گیا، اونچے درجے کے سیلاب سے 72 دیہات متاثر ہونے کا خدشہ ہے۔

انتظامیہ نے بتایا کہ ہزاروں ایکڑ زرعی اراضی زیر آب آ چکی ہے، نگر ایمن پورہ، مبوکی، بستی ابرہیم، ماہی والا، فتی والا سمیت 30 سے زائد دیہات کا زمینی راستہ منقطع ہو چکا ہے۔ڈپٹی کمشنر عمران علی نے کہا کہ انتظامیہ کی طرف سے متاثرہ علاقوں سے انخلا کے لیے مساجد میں اعلانات کرائے جا رہے ہیں، لوگوں کے جان ومال کے تحفظ کے لیے انخلا ہو گا، دریا کے پار جانے پر پابندی ہو گی۔

(جاری ہے)

بہاولنگر میں دریائے ستلج میں بونگہ احسان کے قریب نوجوان دریا میں گر کر ڈوب گیا، نوجوان کی تلاش کے لیے ریسکیو آپریشن شروع کر دیا، موضع سنتیکا، عاکوکا اور بھوریکا کے مقام سے چھوٹے حفاظتی بند ٹوٹ گئے، پانی فصلوں میں داخل ہو گیا، متعدد آبادیاں زیر آب آ چکی ہیں جبکہ دریائی پٹی سے زمینی رابطہ بھی منقطع ہو چکا ہے اور علاقہ مکینوں کی نقل مکانی جاری ہے۔

عارف والا کی ضلعی انتظامیہ کی جانب سے درمیانے درجے کے سیلاب کا الرٹ جاری کیا گیا ہے، لوگوں کو مال مویشیوں سمیت دریائی علاقہ چھوڑنے کی ہدایت کر دی گئی، سیکڑوں ایکڑ اراضی ڈوب چکی ہے۔منچن آباد میںدریائے ستلج میں بابا فرید پل پر پانی کی سطح مسلسل بلند ہو رہی ہے، سیلابی صورتحال کے پیش نظر ریسکیو ٹیموں کی تعداد بڑھا دی گئی، ستلج کے اطراف میں آباد لوگوں کو فوری نقل مکانی کی ہدایت کر دی گئی، متاثرہ افراد کیلئے 6 ریسکیو ریلیف کیمپ قائم کیے گئے ہیں۔