اے آئی نے بولنے سے قاصر انسانوں کو زبان دے دی، نیا سائنسی کرشمہ

ماہرین نے ایسا اے آئی ماڈل ایجاد کر لیا جو انسانی دماغ کے خیالات پڑھ کر انہیں کمپیوٹر اسکرین پر لکھ یا بول سکتا ہے‘رپورٹ

ہفتہ 23 اگست 2025 14:52

اے آئی نے بولنے سے قاصر انسانوں کو زبان دے دی، نیا سائنسی کرشمہ

اسلام آباد(اُردو پوائنٹ اخبارتازہ ترین - این این آئی۔ 23 اگست2025ء)یہ جدید سائنس کا مثبت پہلو ہے کہ انسان کے مسائل حل کرنے میں اے آئی پیش پیش ہے، اب امریکی اسٹینفورڈ یونیورسٹی کے پروفیسر ارین کنز کی زیر قیادت ماہرین نے ایسا اے آئی ماڈل (سافٹ ویئر) ایجاد کر لیا جو انسانی دماغ کے خیالات پڑھ کر انہیں کمپیوٹر اسکرین پر لکھ یا بول سکتا ہے۔

(جاری ہے)

ایک رپورٹ کے مطابق ماڈل میں ڈیرھ لاکھ الفاظ ذخیرہ ہیں، وہ لمحوں میں خیالات سمجھ لیتا ہے، یہ انقلابی ایجاد لاکھوں انسانوں کو زبان دے گی جو پیدائشی یا کسی بیماری و حادثے سے بول نہیں سکتے، یہ اے آئی ماڈل ایک آلے ’’برین، کمپیوٹر انٹرفیسیز‘‘ کا حصّہ ہے جس میں انسانی دماغ کے ’’موٹر کورٹیکس ایریا‘‘ میں سینسر لگے ہوتے ہیں اور جہاں زبان کو حرکت دیتے احکامات جنم لیتے ہیں۔

یہ سینسر احکامات پکڑ کر بذریعہ تار اے آئی ماڈل کو بھجواتے ہیں جو انہیں الفاظ میں ڈھال کر اسکرین پر دکھاتا ہے، ماہرین اس آلے کو ’’وائرلیس‘‘ اور ’’کمپیکٹ‘‘ بنانے کی کوشش کر رہے ہیں تاکہ قوت گویائی سے محروم انسان اِسے بذریعہ موبائل اسکرین استعمال کرکے اپنی مشکل زندگی آسان بنا سکے۔