افغانستان: انٹرنیٹ پر پابندیاں بنیادی حقوق کی خلاف ورزی، انسانی حقوق ماہرین

اسلام آباد (اُردو پوائنٹ ۔ UN اردو۔ 12 اکتوبر 2025ء) انسانی حقوق پر اقوام متحدہ کے غیرجانبدار ماہرین نے افغانستان میں انٹرنیٹ تک رسائی اور سوشل میڈیا پر نئی پابندیوں کو باعث تشویش قرار دیتے ہوئے خبردار کیا ہے کہ یہ اقدامات افغان عوام کے بنیادی حقوق کی سنگین خلاف ورزی ہیں۔

ماہرین کا کہنا ہے کہ نئی پابندیاں ممکنہ طور پر عوامی مکالمے پر کنٹرول اور سماجی طرز عمل کو مخصوص انداز میں منظم کرنے کی ایک وسیع اور دانستہ حکمت عملی کا حصہ ہیں۔

یاد رہے کہ 7 اکتوبر سے طالبان حکام نے افغانستان بھر سوشل میڈیا کے پلیٹ فارمز تک رسائی پر پابندیاں عائد کر دی ہیں۔

(جاری ہے)

خدمات تک رسائی متاثر

ماہرین نے کہا ہے کہ ایسی پابندیاں اظہار رائے کی آزادی اور معلومات تک رسائی کو سختی سے محدود کرتی اور مواصلاتی ذرائع تک رسائی میں بھی رکاوٹ بنتی ہیں۔

انہوں نے خبردار کیا ہے کہ انٹرنیٹ اور ٹیلی مواصلاتی رابطے بند ہونے سے کام، صحت اور تعلیم جیسی خدمات تک رسائی بھی بری طرح متاثر ہوتی ہے۔ افغانستان جیسے حالات میں حکام کے ان اقدامات سے غربت، بے روزگاری اور غذائی عدم تحفظ میں مزید اضافے کا خطرہ ہے۔

ان پابندیوں سے تجارتی سرگرمیاں بھی متاثر ہوتی ہیں اور افغانستان کی پہلے سے کمزور معیشت مزید غیر مستحکم ہو سکتی ہے۔

خواتین اور لڑکیوں کے لیے خطرات

اقوام متحدہ کے ماہرین نے کہا ہے کہ انٹرنیٹ بند ہونے اور سوشل میڈیا پر پابندی جیسے اقدامات سے خواتین اور لڑکیاں بری طرح متاثر ہو رہی ہیں۔

بہت سے افراد سیکھنے، کام کرنے، کاروباری مواقع سے فائدہ اٹھانے اور سماجی روابط کے لیے آن لائن پلیٹ فارمز پر انحصار کرتے ہیں۔

بین الاقوامی قوانین کی خلاف ورزی

بین الاقوامی انسانی حقوق سے متعلق افغانستان پر عائد ہونے والی ذمہ داریوں کے تحت آزادی اظہار اور معلومات تک رسائی پر عائد کی جانے والی کسی بھی پابندی کا قانونی، ضروری اور متناسب ہونا لازمی ہے۔ ماہرین نے واضح کیا ہے کہ طالبان حکام کے موجودہ اقدامات بین الاقوامی تقاضوں سے ہم آہنگ نہیں ہیں۔

انٹرنیٹ اور ٹیلی مواصلاتی رابطوں پر پابندیاں انسانی امداد کی فراہمی میں بھی رکاوٹ بنتی ہیں خصوصاً ایسے لوگوں پر ان کے اثرات کہیں زیادہ ہوتے ہیں جو قدرتی آفات سے متاثر ہوئے ہوں یا پڑوسی ممالک سے زبردستی واپس بھیجے گئے ہوں۔

ان پابندیوں کے باعث صحافیوں اور انسانی حقوق کے محافظوں کے کام کی صلاحیت بھی مزید محدود ہو گئی ہے جبکہ وہ پہلے ہی شدید جبر کا سامنا کر رہے ہیں۔

غیر جانبدار ماہرین و اطلاع کار

غیرجانبدار ماہرین یا خصوصی اطلاع کار اقوام متحدہ کی انسانی حقوق کونسل کے خصوصی طریقہ کار کے تحت مقرر کیے جاتے ہیں جو اقوام متحدہ کے عملے کا حصہ نہیں ہوتے اور اپنے کام کا معاوضہ بھی وصول نہیں کرتے۔