اسلام آباد ‘وفاقی وزیرداخلہ محسن نقوی کا تجاوزات کیخلاف آپریشن کا حکم

ہفتہ 23 اگست 2025 22:27

اسلام آباد(اُردو پوائنٹ اخبارتازہ ترین - آن لائن۔ 23 اگست2025ء) وفاقی وزیر داخلہ محسن نقوی اسلام آباد میں تجاوزات کیخلاف آپریشن کا حکم دے دیا۔وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں اہم اجلاس منعقد ہوا جس میں دارالحکومت میں عوامی سہولت کے لیے جاری اور نئے منصوبوں کا جائزہ لیا گیا۔اجلاس میں فیصلہ کیا گیا کہ ٹی چوک فلائی اوور اور شاہین چوک انڈر پاس کا سنگ بنیاد ستمبر کے آغاز میں رکھا جائے گا، وزیر داخلہ نے تجاوزات کے مکمل خاتمے کا حکم دیتے ہوئے واضح کیا کہ اس حوالے سے کسی قسم کی نرمی نہیں برتی جائے گی۔

مزید برآں محسن نقوی نے 30 ستمبر تک غیر قانونی مکینوں کے خلاف آپریشن کرکے متعلقہ سیکٹرز کو کلیئر کرنے کی ہدایت دی اور ایس ایس پی آپریشنز، اے ڈی سی جی اور ڈائریکٹر ڈی ایم اے کو اس حوالے سے ٹاسک سونپا۔

(جاری ہے)

وزیر داخلہ نے ہاؤسنگ سوسائٹیز کو قواعد و ضوابط پر عملدرآمد یقینی بنانے کی ہدایت دیتے ہوئے کہا کہ خلاف ورزی کی صورت میں سخت تادیبی کارروائی ہوگی۔

اجلاس میں ڈپلومیٹک انکلیو اپگریڈیشن پراجیکٹ کے فیز ون کا آغاز کرنے کی ہدایت دی گئی جس کے تحت شاہراہِ دستور سے مین انٹری، ملحقہ شاہراہ، باؤنڈری وال، سائیکلنگ ٹریک اور پارک کی تعمیر و مرمت شامل ہوگی۔اسی طرح اجلاس میں گندھارا ہیریٹیج اینڈ سٹیزن سنٹر کو فعال بنانے کے مختلف ماڈلز کا جائزہ لیا گیا جبکہ شہریوں کی سہولت کے لیے دامن کوہ کی ری ماڈلنگ کرنے کی بھی ہدایت دی گئی۔

اجلاس میں زیر تعمیر سیکٹرز C-14، C-15 اور C-16 پر کام کی پیش رفت کا جائزہ لیا گیا جبکہ زیر التوا سیکٹرز E-12 اور I-12 کو جلد مکمل کرکے الاٹیز کے حوالے کرنے کی ہدایت کی گئی۔وزیر داخلہ نے مزید کہا کہ نئے سیکٹرز C-13، D-13، E-13 اور F-13 کی ڈویلپمنٹ کے لیے جامع پلان پیش کیا جائے، اسلام آباد میں دو فائیو سٹار ہوٹلوں کی تعمیر کے ابتدائی کام کو 31 دسمبر تک مکمل کرنے کی ہدایت بھی کی گئی۔اجلاس کو بریفنگ میں بتایا گیا کہ ماڈل جیل کا پہلا مرحلہ جاری ہے جو جلد مکمل ہو جائے گا، اسی طرح اسلام آباد میں کیپٹل ہاؤس کے قیام کے لیے جگہ مختص کر دی گئی ہے، اجلاس میں چیئرمین سی ڈی اے محمد علی رندھاوا، ممبران سی ڈی اے، اے ڈی سی جی، ایس ایس پی آپریشنز اور دیگر حکام نے شرکت کی۔