میرا گووندا صرف میرا ہے، کوئی الگ نہیں کر سکتا، سنیتا آہوجا

کوئی ہم دونوں کو الگ نہیں کر سکتا، کوئی بھی آ جائے، ہمیں الگ نہیں کر سکتا

جمعرات 28 اگست 2025 16:21

ممبئی (اُردو پوائنٹ اخبارتازہ ترین - این این آئی۔ 28 اگست2025ء)بالی ووڈ اداکار گووندا کی اہلیہ سنیتا آہوجا نے کہا ہے کہ وہ اپنے شوہر گووندا کو کبھی نہیں چھوڑیں گی۔بھارتی میڈیا کے مطابق گووندا اور ان کی اہلیہ سنیتا آہوجا حال ہی میں اپنی شادی کے حوالے سے مشکلات کی خبروں کی وجہ سے سرخیوں کی زینت بنے ہوئے ہیں۔متعدد رپورٹس میں دعوی کیا گیا تھا کہ سنیتا نے طلاق کیلیے درخواست دائر کی ہے، جوڑے نے آج مذہبی رسومات منانے کے لیے اکٹھے نظر آ کر ان افواہوں کی تردید کر دی۔

میڈیا سے بات کرتے ہوئے سنیتا نے کہا کہ گووندا ہمیشہ میرے شوہر رہیں گے اور کوئی بھی ہمارا یہ رشتہ نہیں توڑ سکتا، آج ہم اتنے قریب ہیں، اگر کچھ ہوا ہوتا تو کیا ہم اتنے نزدیک ہوتی ہمارے درمیان دوریاں ہوتیں۔

(جاری ہے)

انہوں نے مزید کہا کہ کوئی ہم دونوں کو الگ نہیں کر سکتا، کوئی بھی آ جائے، ہمیں الگ نہیں کر سکتا، ایک فلم تھی میرا پتی صرف میرا ہے، بالکل اسی طرح میرا گووندا صرف میرا ہے اور کسی کا نہیں، جب تک ہم خود کچھ نہ کہیں، تب تک آپ لوگ پلیز اس معاملے پر کچھ نہ بولیں۔

مذہبی تقریب کے دوران سنیتا نے جامنی رنگ کی ساڑھی پہنی ہوئی تھی، جبکہ گووندا سرخ کرتا پہنے ہوئے تھے، ان کے بیٹے یش وردھن آہوجا کو بھی تقریبات میں دیکھا گیا، اس موقع پر گووندا اور سنیتا نے اپنی رہائش گاہ کے باہر جمع پاپارازیوں کو مٹھائی بھی تقسیم کی۔کچھ دن پہلے گووندا کے منیجر ششی سنہا نے طلاق کے بارے میں قیاس آرائیوں کو مسترد کرتے ہوئے انہیں پرانی اور گمراہ کن قرار دیا تھا۔

واضح رہے کہ سنیتا اور گووندا ایک نجی تقریب میں شادی کے بندھن میں بندھے تھے اور انہوں نے 1989 میں اپنی بیٹی ٹینا آہوجا کی پیدائش تک اپنی شادی کو خفیہ رکھا تھا۔جوڑے کے ہاں تقریبا ایک دہائی بعد 1997 میں دوسرے بچے بیٹے یش وردھن کی پیدائش ہوئی تھی۔ٹینا پہلے ہی اپنا بالی ووڈ ڈیبیو کر چکی ہیں، جبکہ یش وردھن سائی راجیش کی اب تک بے نام فلم سے اداکاری کی دنیا میں قدم رکھنے کے لیے پوری طرح تیار ہیں۔