جوئے کی ایپس کی تشہیر، ڈکی بھائی کی بیوی عروب جتوئی عدالت طلب

منگل 21 اکتوبر 2025 11:54

لاہور (اُردو پوائنٹ اخبارتازہ ترین - این این آئی۔ 21 اکتوبر2025ء) جوئے کی ایپلی کیشن کی سوشل میڈیا پر تشہیر کے کیس میں عدالت نے یوٹیوبر سعد الرحمن المعروف ڈکی بھائی کی بیوی عروب جتوئی کو طلب کرلیا جب کہ ڈکی بھائی کے خلاف بھی نیشنل سائبر کرائم انویسٹی گیشن ایجنسی (این سی سی آئی ای)نے چالان عدالت میں جمع کرادیا۔

(جاری ہے)

ڈکی بھائی 20 اگست سے این سی سی آئی کی تحویل میں ہیں جب کہ ان کی اہلیہ عروب جتوئی قبل از گرفتاری ضمانت پر ہیں لیکن اب عدالت نے انہیں آئندہ ماہ نومبر کے آغاز میں طلب کرلیا۔

نجی ٹی وی کے مطابق عروب جتوئی کو لاہور کے جوڈیشل مجسٹریٹ کی عدالت نے طلب کرلیا جب کہ این سی سی سی آئی نے دیگر ملزمان کو بھی نوٹسز جاری کردیے۔ڈکی بھائی اور عروب جتوئی کے خلاف جوئے کی ایپلی کیشن کی تشہیر کے کیس کی سماعت جوڈیشل میجسٹریٹ نے کی۔جوڈیشل مجسٹریٹ نے کیس کی سماعت 3نومبر 2025تک ملتوی کرتے ہوئے عروب جتوئی کو طلب کرلیا تاکہ کیس کی کارروائی مزید آگے بڑھائی جا سکے۔