گولڈ میڈل کا جھوٹا دعویٰ،نیٹ بال فیڈریشن بچ نکلی

پی ایس بی نے فراڈ کے باوجود وارننگ دیکر چھوڑ دیا،سوالات اٹھ گئے

جمعہ 29 اگست 2025 14:15

اسلام آباد(اُردو پوائنٹ اخبارتازہ ترین - این این آئی۔ 29 اگست2025ء) پاکستان اسپورٹس بورڈ نے پاکستان نیٹ بال فیڈریشن کو حکومت سے فراڈ اورگمراہ کرنے کے باوجودحیران کن طور پر صرف وارننگ دیکر چھوڑ دیا۔

(جاری ہے)

تفصیلات کے مطابق نیٹ بال فیڈریشن نے حکومت کو گمراہ کرتے ہوے گرلز ایشین یوتھ نیٹ بال چیمپئن شپ میں سونے کا تمغہ جیتنے کا دعویٰ کیا تھا اور ساتھ ہی کیش انعامات دینے کا مطالبہ بھی کیا تھا تاہم تاہم ایشیائی گورننگ باڈی کی آفیشل ویب سائٹ نے اس جھوٹ کی قلعی کھولتے ہوے پاکستان کی چھٹی پوزیشن ظاہرکی جس پر وفاقی حکومت نے سخت نوٹس لیا سور اور پاکستان سپورٹس بورڈ کو انکوائری کرنے کی ہدایت کی تھی۔

امکان ظاہر کیا جارہا تھا کہ حکومت سے فراڈ اور گمراہ کرنے کی کوشش پرنیٹ بال فیڈریشن کے ذمہ دار عہدیداروں پر پابندی عائد کی جاے گی لیکن پی ایس بی نے اس دھوکہ دہی پر صرف ایک ہلکی وارننگ پر معاملہ ختم کر دیا جس سے پاکستان سپورٹس بورڈ کی غیر جانبداری اوراحتساب کے طریقہ کار پرسوالات اٹھ گئے ہیں کیونکہ اس سے قبل پاکستان ویٹ لفٹنگ فیڈریشن پر بھی پی ایس بی نے پابندی عائد کی تھی۔