بلال کالونی پولیس مقابلے میں زخمی ہو کر فرار ہونے والا ملزم اسپتال سے گرفتار

زخمی ملزم محمد اقبال علاج کی غرض سے رکشا میں سوار ہو کر عباسی شہید اسپتال پہنچا تھا،پولیس

جمعہ 29 اگست 2025 16:10

کراچی (اُردو پوائنٹ اخبارتازہ ترین - این این آئی۔ 29 اگست2025ء)شہر قائد میں بلال کالونی پولیس اور ڈاکوؤں کے درمیان ہونے والے مبینہ پولیس مقابلے میں زخمی ہو کر فرار ہونے والا ملزم کو عباسی شہید اسپتال سے گرفتار کر لیا گیا۔تفصیلات کے مطابق جمعرات کی شب پاور ہاؤس چورنگی کے قریب بلال کالونی پولیس اور ڈاکوؤں کے درمیان فائرنگ کا تبادلہ ہوا تھا۔

(جاری ہے)

دو طرفہ فائرنگ کی زد میں آ کر ایک راہگیر خاتون، 30 سالہ نسرین شدید زخمی ہو گئی تھی، جبکہ ایک ڈاکو زخمی حالت میں فرار ہونے میں کامیاب ہو گیا تھا۔ذرائع کے مطابق، فرار ہونے والا زخمی ملزم محمد اقبال علاج کی غرض سے رکشا میں سوار ہو کر عباسی شہید اسپتال پہنچا، جہاں پہلے سے موجود ایک انٹیلی جنس افسر نے مشتبہ شخص کی حرکات پر نظر رکھتے ہوئے فوری طور پر بلال کالونی پولیس کو اطلاع دی۔پولیس ٹیم نے بروقت کارروائی کرتے ہوئے اسپتال پہنچ کر ملزم کو شناخت کے بعد حراست میں لے لیا۔ پولیس ذرائع کا کہنا ہے کہ گرفتار ملزم سے اسلحہ کی برآمدگی اور دیگر ساتھیوں کی تلاش کے لیے مزید تفتیش جاری ہے۔